麥玲玲舊照出土勁cute被讚靚女 廿歲定50童顏不老:做老婆一流

著名堪輿學家麥玲玲唔知係咪幫自己擺咗啲咩風水陣，2021年旺到爆！除咗早前因為批中內地女星鄭爽有「桃花劫」而被熱捧為「神預測」外，近日連個樣都受到高度關注！

{{hket:inline-image name="2d9e60ffe893a20f2cce11f5f9c91bda.jpg"}}{{/hket:inline-image}}

噚日麥玲玲嘅一批舊照突然被網民放上討論區，當中除咗有學生相同生活照之外，仲有婚照同證件相，面圓圓嘅玲玲幾乎每張都笑得咁燦爛，睇落都覺得好順眼又福相！開post嘅網民大讚佢「後生（時）又幾靚女」，唔少朋友都附和！

有網民讚麥玲玲後生時好cute好可愛，仲話娶佢返去做老婆一流，好過對住個國色天香但黑口黑面嘅女人：「我係老公見到佢成日笑都開心」，又有網民讚佢keep得好，學生相同而家相比好似只係換咗套衫：「幾廿年後都冇乜點變」。

（↓點擊圖片放大↓）

麥玲玲得到一班網民讚賞，表示覺得受寵若驚：「我唔敢當，冇可能係靚女！」佢又指自己細細個外貌已經比較成熟，19、20歲搭的士嘅時候的士司機已經以為佢20幾、30歲，佢話自己細個個樣已經「老定」咗，反而令到而家個樣冇乜變。

原來麥玲玲再過多幾日就55歲，真係一啲都睇唔出！玲玲師傅仲同大家分享佢嘅「駐顏」術，佢透露自己係個唔捱得夜嘅人，亦唔煙唔酒。保養方面佢都冇特別做，只過係早瞓同注重健康，佢更講笑話如果自己能夠瘦啲就仲靚啲！唔好喇師傅，而家已經咁受歡迎，再瘦就不得了！