袁文傑「亂入」專訪讚老婆值100分 張潔蓮諗嘢有「偏差」靠老公調節？

袁文傑（Andrew）與張潔蓮（Jackeline）拍拖9年，二人原訂於2018年底結婚。不過袁文傑嘅媽媽於2018年10月逝世，加上愛貓相繼離世，最終決定將婚禮延期。然而延期亦絲毫無損二人感情，袁文傑表白：「陪伴是最長情的告白。」終於佢哋喺上年平安夜公布拉埋天窗並發放婚照，甜蜜留言：「一生一世的承諾，守護、包容、不離不棄、終生相伴。Jackeline & Andrew在一起啦！」

{{hket:inline-image name="132361966_121659833120061_1394511310160525167_n.jpg"}}{{/hket:inline-image}}

Jackeline日前獲主持人倪詩蓓邀請到新城節目《詩情廿四味》 擔任嘉賓，「Jackeline姐姐」當年主持兒童節目《閃電傳真機》，廿年之後，Jackeline個樣幾乎係冇變過！而家職業為幼兒教師嘅佢分享自己凍齡秘訣，就係經常同小朋友喺一齊，咁就可以擁有一顆童心同埋keep到靚靚童顏。

{{hket:inline-image name="image2.jpeg"}}{{/hket:inline-image}}

Jackeline表示受疫情影響，同老公只可以低調進行婚事，待疫情緩和後會再設宴同家人以及親友慶祝。節目中段袁文傑「突襲」直播室，只見近年比較少面對鏡頭嘅Jackeline一見到老公就好開心，以及有一種「安樂晒」嘅放鬆感覺，袁文傑仲話呢次係佢同太太第一次一齊上訪問節目。

倪詩蓓搵咗8個旅行結婚地方畀袁生袁太選擇，夫妻二人好有默契，異口同聲話喜歡冰島，男方話覺得冰島有一種特別嘅「氣氛」，喺好耐之前已經好鍾意呢個地方，而且當地冰川同火山共存，仲有機會可以見得到極光，非常特別！

（↓點擊圖片放大↓）

講到二人婚後身分有所轉變，由完美女友成為袁太，袁文傑大讚老婆值100分。夫妻仲分享佢哋嘅相處之道，不外乎係包容、體諒。問到二人有乜嘢需要對方體諒時，Jackeline即刻「攬上身」話自己諗嘢有「偏差」，「同一般一諗嘢唔同，要靠佢（袁文傑）話番畀我知應該係點。」袁文傑即刻舉例話有次佢開早餐穀物片嘅時候本身只係剪開兩、三吋，而「不拘小節」嘅Jackeline就一下子將剪到最大開口。

不過男方都衝出嚟承認自己有不足，「有時我睇開波，講嘢慣咗大聲，佢就會覺得我係命令式。」佢事後好快會氹番老婆，諗起講嘢咁溫柔嘅Jackeline，真係覺得佢哋性格係一凹一凸，perfect match呀！