苑瓊丹戰兢搞超市王國怕被搵笨 諗頭多多身家超越億萬富商老公

瓣數多多的苑瓊丹（苑仔）早前進軍飲食業，呢日仲話將會投資超級市場業務！佢與其他股東出席開幕儀式，期間苑仔心情大好滿場飛，更豪言以上市為目標︰「靠我自己就梗係做唔到啦，好在識到一班老實唔呃人嘅Partner，佢哋做實事，我負責做宣傳，咁就夾埋一齊打天下！你知啦，藝人做生意好易畀人呃，都怕會損手輸入肉，所以揀拍檔先係最難嘅一件事！如果有朝一日，可以過吓上市公司老闆癮，咁就一生無憾啦！」

{{hket:inline-image name="2R9A3491.JPG"}}{{/hket:inline-image}}

苑仔坦言會不斷擴充業務，目標每區都有新店開張，「我哋唔係想做大茶飯，走貼地路線，希望街坊慳到錢，我哋又賺少少咁囉！加上我有熟絡嘅餸包品牌，而家一條龍咁做（你有錢啲定老公身家厚啲？）傻啦！我啲錢係我嘅私己，佢啲錢係賺嚟養我，所以永遠都係我贏晒，業務越搞越大多錢過我老公！」

她笑言老公唔介意自己忙碌而無時間「拍拖」，話幾個月唔見都冇乜嘢所謂，「唔係我哋感情有事，而係我哋生活習慣係咁嘛！之前冇疫情，去內地拍戲一走就幾個月啦，無信任維繫唔到嘅，所以呢年有疫情冇得離港開工，佢賺晒見我嘅時間啦！」

（↓點擊圖片放大↓）

苑仔十幾年前嫁老公「玻璃大王」黃乃揚，有報道指其身家超過兩億。雖然可以做闊太，但苑仔一直Keep住工作，諧趣形象深入民心，令佢喺國內都好吃香㗎！不過近年佢減產，全力以赴向商界發展，曾斥資千萬投資活髮產品生意。

其實苑仔多年來都投資過唔少生意，不過佢就話總結多年做生意投資冇賺大錢，但又冇蝕錢，賺到嘅係經驗及教訓。沙士期間開過按摩店，收支平衡，後來股東覺得付出同收入不成正比，所以先將生意結束。苑仔指藝人做生意有好有壞，「好處是較易引起大家的關注，壞處就是大家覺得你是藝人，本來賣畀普通人嘅嘢就一蚊，賣畀我哋就要兩蚊！」