溏心風暴之家好月圓︳「中仔」走肥變肌男輪廓出晒嚟 36歲溫家恆與陳法拉「姊弟情深」

李香琴日前因病離世，為悼念李香琴，翡翠台尋晚開始重播《溏心風暴之家好月圓》。眨吓眼，原來劇集已經係2008年嘅作品，劇中除咗一班老戲骨「大鬥法」之外，一眾仔女「家、好、月、圓、慶、中、秋」當年都好搶鏡。

{{hket:inline-image name="TopBanner_MoonlightResonance.jpg"}}{{/hket:inline-image}}

當中飾演孻仔「中仔」嘅溫家恆係咁多個仔女中最生面口嘅一個，但戲份仲多過黎諾懿飾演嘅阿哥甘永圓，非常吸睛。不過自《家好月圓》之後溫家恆都再冇令人印象深刻嘅作品，好似喺娛圈蒸發咗咁！

不過原來佢仍然活躍喺Model界，仲有唔少大Brand搵佢拍廣告添！大家分分鐘都有喺地鐵嘅廣告板見過佢，不過就未必認到，事關依家已經36歲嘅佢冇晒baby fat，變身有六舊腹肌嘅大隻中佬，輪廓都出晒嚟，完全判若兩人！

（↓點擊圖片放大睇「中仔」↓）

溫家恆於英國土生土長，於英國倫敦大學學院畢業後返香港，加入美銀美林工作，一年後又轉投高盛，20歲出頭就月入3萬。2006年加入無綫並開始成為《港生活‧港享受》及《東張西望》主持之一，常被派往英國及其它英語國家對藝人進行採訪。

2008年，電視劇《溏心風暴》監製劉家豪為該劇續集《溏心風暴之家好月圓》選角時，由於佢有「竹昇仔」感覺，因此由佢擔任戲中9歲就畀夏雨送去英國讀書嘅「中仔」。

（↓點擊圖片放大睇「中佬」↓）

未知係咪因為大家都係讀「番書」，溫家恆同劇中嘅家姐「阿慶」陳法拉似乎份外投緣，翻睇佢嘅社交平台見到法拉2019年嘅婚禮都有邀請佢，而且多年來都不時有contact，姊弟關係keep足12年！