關淑怡8分鐘影片粒聲唔出煲煙 鏡頭前「阿飛正傳」：我唔係黐線

現年54歲嘅歌手關淑怡（Shirley) 行為向來都大膽出位、我行我素，近年她行為飄忽，今年4月更突然指感到不被尊重，宣布退出樂壇。繼退出樂壇之後，Shirley噚日喺自己嘅社交平台上傳咗一條長達8分鐘嘅影片，片中其行為令人不解，令唔少粉絲都非常擔心。

影片嘅背景疑似酒店房內，片中Shirley著上黑色羽絨、戴上耳機同眼鏡，全程一言不發。8分幾鐘入面她食咗差唔多兩支煙，期間不停咁「蠟頭」和整理衣衫，幾次將拉鍊拉上拉落。去到影片嘅後半段，Shirley更加跳起舞嚟，似足《阿飛正傳》張國榮獨舞一幕，不過就聽唔到現場有任何音樂。唔少粉絲睇到之後都表示有啲擔心她係咪情緒出咗問題。

不過Shirley好快就發長文解釋，指自己「無無聊聊」，聽William Orbit嘅《Barber's Adagio for Strings》remix，「獨舞做自己，我唔在乎人哋點講。我唔係黐線，只係你哋聽唔到我聽緊嘅歌，如果唔係我哋都會一齊喺呢個令人沮喪嘅時代跳舞。但我必須有信心，我知道一切會安好，做自己 ，珍惜自己嘅才華，就算冇人在乎。如果你係好嘅，冇嘢可以破壞你嘅『天賦』。」

Shirley近年負面新聞多多︰2016年於愉景灣墮海，有指佢墮海前曾透露因工作問題唔開心，幸獲消防員趕至搶救並將她送院。翌年，Shirley同愉景灣酒店職員爭執兼傷人，期間涉嫌出言恐嚇被捕，佢承認一項普通襲擊罪判罰2,000元，並留有案底，刑事恐嚇罪則獲控方撤銷起訴。

撰文︰黃蘊姿