奚夢瑤帶「阿仔」何猷君出巡被捕獲 「長短腳之戀」多次被誤認為母子

賭王何鴻燊四房孻仔何猷君同內地超模奚夢瑤舊年5月拉埋天窗，10月仲火速誕下何家長孫何廣燊。二人婚後一舉一動都備受外界關注，佢哋作風亦相當高調，參加綜藝節目《幸福三重奏》喺鏡頭前奉旨曬恩愛，唔介意將夫妻相處日常赤裸裸咁呈現觀眾眼前！

節目中猷君經常都好似「小奶貓」咁跟住老婆，無論奚夢瑤喺廚房﹑客廳定其他地方，佢都不時上前抱抱或討抱抱，仲寶貝前寶貝後咁叫，向老婆撒嬌。

雖然猷君非常黐身，不過有時都好man，近日夫妻於機場畀網友捕獲，仲拍埋片放上網，只見好老公猷君全程推住行李，老婆就兩手揈揈，完全唔使操勞。之但係網民就再次focus咗喺二人嘅「最萌身高差」！片中所見奚夢瑤足足高猷君大半個頭，有人仲覺得即使話二人係母子都毫無違和感！

早前都有人影到二人喺尖沙咀出沒，身高178cm嘅奚夢瑤著平底鞋都比老公高，大家一直都好好奇猷君嘅真實身高，不過佢從來都冇公開過，而網民睇到呢啲相之後就肉眼判斷猷君只有165cm咁話。

其實圈中都有唔少「長短腳夫妻」，仲對對都咁幸福㗎！