歌手鄧紫棋（G.E.M.）與造型師男友魏俊傑Mark拍拖近3年，非常甜蜜，男方不時喺IG repost對方帖子。今年五月更傳出二人喺泰國秘婚，雖然唔係真，但佢哋感情十分穩定，似乎打風都打唔甩。
男方IG有好多G.E.M.帖子。（Mark IG）
不過，佢哋一齊之後亦是非不絕，之前一直有傳G.E.M.係撬好朋友JW（王灝兒）牆腳。今日再有讀者爆料，指控Mark「唔簡單」。
G.E.M.同Mark（左）一齊之後，冇再同JW（右）「孖公仔」嘞！（網上圖片）
爆料者自稱同Mark曾經係朋友，話自從男方同G.E.M.一齊之後就「頂佢唔順」，指佢表面上話自己係G.E.M.嘅Stylist，實質係「軟飯王」，仲指佢經常炫富兼「曬命」，G.E.M.任佢擺佈云云。
Mark其實係富三代嚟！（Mark IG）
爆料者續指Mark性格暴躁，曾經係夜店因為溝女而同人大打出手，非常兇狠，令對方最終送院，要縫十幾針。Mark因為呢年事喺2017年被判入獄3個幾月！
但翻查Mark嘅網上社交平台，受刑期間仍不斷更新，爆料者就指係G.E.M.為咗幫佢隱瞞而若無其事代為update！
女方近年造型都係出自男友之手。（Mark IG）
本報聯絡G.E.M.公司，發言人已讀不回，而Mark嘅妹妹、TVB藝員魏韵芝至截稿前未有回覆。
Mark嘅妹妹魏韵芝都係藝人。（Mark IG）
G.E.M.好姊妹李蘊現時身在廣州，佢得知Mark曾坐監時反應甚大，「吓，真係唔知喎！我哋有電話聯絡，但因為疫情都成年冇見，同埋我同佢唔算熟，好少同人哋男朋友熟。（Mark性格躁狂？）平時見佢都係同G.E.M.一齊，同埋佢講英文，好斯文、好gentleman，冇見過佢發脾氣。（擔心佢？）要核實吓，我陣間都會打電話問吓G.E.M.。（會問埋何超蓮？）我都唔知佢而家喺邊，佢成日周圍飛。」
何超蓮（左）、李蘊（中）同G.E.M.，情同姊妹。（網上圖片）
其實G.E.M.自立門戶後成立新的歌迷會，Mark在公在私成其左右手，甚至連歌迷會會費都直接存入其戶口，更盛傳Mark獲G.E.M.打本開設個人時裝品牌Yeshua。fans都覺得做法不妥，之前曾經有睇唔過眼嘅粉絲直接於微博聲討Mark，不滿佢干涉G.E.M.嘅事業同財政。
Mark嘅媽媽（中）都好猛料，係經營飲食業嘅女強人。（魏韵芝IG）
其實Mark都係出身富裕家庭，外公王國旌係香港有名嘅富豪、媽媽亦有同四洲集團太子女戴凱欣合資開餐廳，係名副其實嘅富三代。
撰文：黃蘊姿