最近有一條短片喺網上瘋傳,攝影師只係將影到一名西藏少年靦腆一笑嘅7秒短片上傳,就令到呢名少年一夜爆紅。
好有陽光氣息!(網上圖片)
片中呢名西藏少年叫扎西‧丁真,今年只有20歲嘅佢係康巴藏族人,來自四川。丁真喺片中嘅笑容又pure又true,再加埋佢神級嘅美男子容顏,瞬即吸納咗海量粉絲,微博有關「丁真」嘅搜尋瀏覽量都到達四十億。中國外交部發言人華春瑩都喺社交平台連發三個帖文宣傳丁真,同時「丁真珍珠」的名氣已傳播至日本和韓國,非常誇張。
有人話佢一雙電眼好似梁朝偉!(網上圖片)
梁朝偉(東星娛樂)
丁真成為網紅後,11月尾開通社交平台,短短10幾日已吸逾130萬粉絲。唔少娛樂機構都爭相向佢招手,不過丁真冇打算做藝人,反而投向國企,簽約並成為理塘縣旅遊形象大使,每月只賺取3,500元人民幣(約4,200港元),並拍攝宣傳片《丁真的世界》。樸實嘅丁真表示:「外面的世界很大,但我還是最愛我的家鄉。」
丁真冇因為紅咗而心雄。(網上圖片)
反而心繫家鄉。(丁真微博)
丁真令理塘成為熱門景點,理塘嘅甘孜州酒店預訂量較2019年同期增長89%,中國各地旅遊部門開始邀請丁真擔任代言人以促進觀光活動,以丁真為名的商標也遭到了中國公司搶先註冊,掀起咗「丁真效應」。
青春,真可愛青春。(丁真微博)
Fans瘋狂送禮物畀丁真。(丁真微博)
無獨有偶,四年前都有人因為個樣而走紅,不過就唔係因為生得靚仔,而係因為佢生到同內地富翁馬雲一模一樣,就連馬雲見到呢個小朋友都話佢同自己細個生得好似。
同馬雲真係餅印咁。(微博圖片)
這個小馬雲的真名叫範小勤,來自江西吉安永豐縣。範小勤家境貧寒,父親範家發年輕時被蛇咬截肢成為殘疾人;母親有小兒麻痺症兼盲咗一隻眼;嫲嫲仲有認知障礙,不過範小勤成為網紅似乎為佢哋屋企帶嚟一絲希望。2017年,範小勤被商人劉長江帶到河北石家莊返學同生活,範小勤爸爸二話不說應承,認為總好過跟住自己生活。
範小勤喺短片中只係飲飲食食,好似扯線公仔一樣。(網上圖片)
但半年後,範小勤就冇再返學,但關於佢嘅短片就一直更新。範小勤爸爸回憶,呢幾年範小勤都冇長大長高過,講嘢亦唔清楚,情況令人擔憂。
撰文:黃蘊姿