【惡人先告狀】上門前多次致電遭拒接 客人反投訴收不到貨 送貨員一句話完美反擊

送貨員走遍各區派件，工作辛勞，客人應多體諒。一名送貨員發文分享，指日前為一名客人送米，事前欲致電對方核對地址，卻被無故「Cut線」，故未有上門。事後，該名客人抱怨指遲遲未收到貨，事主遂強調已多次致電對方；未料對方竟稱「唔聽陌生人電話」，更指要向事主上司投訴。事主最終以一句話成功反擊，獲網民大讚「做得好」。

一名自稱為送貨員的男網民上周五（20日）在Facebook群組「Tai Po 大埔」中發文，表示自己當天上午為客人送貨，上門前欲先致電對方核對地址，未料電話響鈴兩下就被「Cut線」，事主再次撥電仍遭拒接聽，遂先為下一位客人送貨。

【好人好事】外賣碗破裂倒瀉熱湯，聾啞外賣員抱歉欲賠錢，暖心顧客一個小舉動感動網民，詳情即睇：【下一頁】

客人稱「唔聽陌生人電話」拒接電

當事主送完貨回到公司時，卻收到該名「Cut線」客戶的來電。對方質問事主「點解叫咗2日貨都唔送上嚟」，更投訴指「都唔知係唔係做生意嘅」；事主聞言馬上作出了解，雙方對話如下：

事主：搵到喇，請問你係唔係XXXXX電話XXXXX？

客人：係呀，咁你哋仲唔即刻送上嚟？

事主：你好，我打過幾次畀你，想同你對啱地址先送嚟，但電話響咗幾下就Cut咗線，所以冇送畀你。

客人：係咩？我唔聽陌生人電話㗎，你即刻送上嚟，我喺屋企等咗你哋2日。

事主：你好呀，送貨畀你嘅必定係陌生人，而唔係你屋企人，你唔聽電話我好難確定你地址同有冇人喺屋企。

然而，該名客人似乎不接受事主解釋，著他「叫你老細嚟聽」；惟事主亦「不甘示弱」，決定以其人之道還治其人之身，向對方表示：

「你好，我老細唔聽陌生人來電，請你在家耐心等候，嘟......」

網民斥自以為是：唔急都唔會打幾次

不少網民看到帖文後，均批評該名客人自以為是，「明知自己買嘢要送貨就留意吓陌生電話啦，收唔到貨仲要怪人哋」、「唔急都唔會打幾次，個客真係坐住咗個腦」、「地球係要圍住我轉系列」；亦有人笑言事主的回答十分「抵死」，「最尾嗰句最精彩」、「回佢，我唔送貨畀陌生人」。

另外，亦有同為送貨員的網民分享自身經歷，「個客話6點後先有人，咁我就安排咗之後先送，結果佢3點幾突然之間打嚟，嗌我即刻送畀佢，4點前要到」、「出件前話要15分鐘前打畀佢，司機因為怕塞車，提早30分鐘通知話幾點到達，點知個客打去寫字樓投訴，話講明只可提前15分鐘先通知」。

【新冠肺炎】大門貼紙提醒「家中有病童」，媽媽因送貨員貼心舉動大受感動，詳情即睇：【下一頁】

每朝索取《晴報》：精明生活．健康家庭．娛樂資訊

撰文：蘇麗儀