【家有惡妻】人夫每晚放工陪上司飲酒 惡妻轟炸式短訊迫回家交人揭另有內情

不少打工仔放工後都要應酬飯聚，一位人夫便經常要陪上司飲酒消遣，卻因此惹起家中「惡妻」不滿，在聚會時更收到妻子轟炸式短訊，要提早回家「交人」，其後更對類似聚會可免則免，不過原來「惡妻」背後另有內情，實為他婉拒聚會的妙計。

Facebook專頁「辦公室日報」版主聶瞳周日（8日）以「家有惡妻 HAPPY HOUR都要簽回條」為題發文，指曾經遇到一位喜歡跟下屬到酒吧消遣的上司，雖然其他同事都不喜歡赴會，每次都盡量推卻，但偶爾仍然要「畀面」出席。有次眾人放工後到尖沙咀一間酒吧「Happy Hour」消遣期間，其中一位同事Nathan電話響起，並對電話的另一方說道：

「喂，老婆……同班同事飲緊嘢……唔係呀……咁又冇……吓……唔係，我唔係咁嘅意思……好小事咋喎……你聽我講先……得得得，我而家返嚟……唔好咁啦……返嚟再講……而家搭的士返嚟。」

眾人意識到氣氛凝重，待Nathan掛線後立即詢問何事，他則表示妻子得知自己到酒吧消遣便大發雷霆，為免「家變」要立即回家。當時上司及其他同事均取笑Nathan「怕老婆」，又慶幸自己的女朋友及妻子並不是「惡妻」。

中年人夫月入$4萬被裁壓力大，失業一年半愛妻陪搵工 人工減半轉行做司機養家，詳情即睇：【下一頁】

播放「惡妻」語音訊息避難

另有一次，午飯時上司已表明放工後去酒吧，但放工前Nathan突然稱要爽約，更直接拿出手機播放妻子的語音訊息：

「我一樣要返工，即係陣間屋企啲嘢我做晒？你就Happy Hour，我就Unhappy Hour，想問下你放工仲要應酬當唔當OT？有冇補水？返一份工朝九晚十一？你工時都好誇張下喎！你返文職定係做陪酒？唔返嚟都冇問題㗎！你決定吖！」

聶瞳形容該同事妻子聲音「殺聲震天」，其他同事聞言亦被嚇倒，勸喻Nathan下班後盡早回家「交人」；待他離開後，各同事又再一次議論紛紛，直言他「家有惡妻，飲杯嘢都要簽回條」。

「賢妻」扮「惡妻」幫丈夫推卻聚會

聶瞳指雖然已經不再與Nathan共事，但彼此仍然有聯絡，早前他獲邀請到對方家中吃飯，卻擔心惹起其妻不悅有點遲疑，但在對方再三堅持下，終答應登門拜訪。他及後發現，Nathan的妻子個性溫柔親切、笑臉迎人，與當年的形象判若兩人，暗忖：「代入唔到當年殺聲震天個形象，還是……換咗老婆？」Nathan察覺到其疑慮，直接解釋：

「其實一直以嚟都係我迫老婆做衰人，佢係唔會管我㗎！」

此時其妻子才道出真相，指丈夫不欲陪伴上司在工餘時間喝酒消遣，不好意思開口拒絕又怕得罪人，故一早擬定對白要求她扮演「惡妻」，假意禁止丈夫外出消遣；而她早前亦利用丈夫作為「擋箭牌」，推卻跟隨朋友到酒店Staycation。

「好公司應讓員工有更多私人生活」

Nathan表示，職場上難以認識真心朋友，在老闆、上司、同事面前，大部分時間都不可以表現自己真實一面，只認定妻子是自己的「Soulmate」（靈魂伴侶）；夫妻二人朝夕相處下，即使是一個眼神或一個表情語氣，便已經意會到彼此的想法，

「人生有3分2時間係工作，我真係唔願意再花時間去應酬，雖然好多嘢可以出公數，甚至當時Happy Hour都係上司請，不過呢啲根本就唔係福利，一間公司最好嘅福利，其實係畀員工有更多私人生活同埋時間，但你知道出嚟做嘢有時身不由己，好在老婆唔介意做衰人角色，幫我解決咗好多麻煩。」

內容獲「辦公室日報」授權刊登。

在最幸福之時丈夫食道癌離世，55歲婦帶亡夫遺願重返校園圓夢，詳情即睇：【下一頁】

每朝索取《晴報》：精明生活．健康家庭．娛樂資訊

撰文︰黎穎芯