【舉手之勞?】司機餐盤執單據換免費泊車 港女當場撕毀：八達通號碼係私隱

不少大型商場都有消費後免費泊車優惠，故不時有司機為慳錢拾取他人棄置的收據，不過近日有位女子於尖沙咀的商場用膳後，發現單據被人拾取時即上前制止，並當場將單據撕毀，表明上面印有八達通號碼，屬於個人私隱。女事主在網上分享經歷，提醒大家要保護好個人資料，卻被網民反諷：「幾時八達通號碼都係私隱？」

該名女食客在Facebook群組「將軍澳主場」上發帖，指近日與同事在K11 Musea內的美食廣場用膳，期間發現一名男子不斷徘徊於她們座位附近，形容對方形跡可疑。直至她們用膳完畢，將餐盤放到回收處之際，該男子突然上前拿走餐盤上的單據，然後轉身離開。事主見狀，即時上前將其截停，對方承認自己欲以單據換取泊車優惠，遂向她表示：

「如果你介意，我可以把單據交還畀你。」

對此，事主即拿回單據並當場撕毀，並向對方指：

「當然介意，因為單據上印有我八達通卡號碼，那是我的私隱。」

事主又在文末提醒其他網民，用膳後要記緊帶走所有單據，以防八達通卡、信用卡號碼等較為敏感的個人資料外洩。

網民：八達通號碼可以做到啲咩？

不過，該則「溫馨提示」上傳後卻引來熱議，大部分網民均認為事主大驚小怪，反問：「八達通號碼可以做到啲咩」、「你驚佢會幫你增值呀？」；又質疑事主如果認為八通達號碼是「私隱」，便不應隨手放在餐盤上，「咁緊張自己私穩又唔即時袋好張收據」。

另有網民認為，單據對於事主而言只是廢紙一張，「自己唔泊車，垃圾都唔可以益人」，給予男子領泊車優惠僅屬舉手之勞，又形容：「搵泊車飛好正常」。不過亦有人認為事主做法無問題，強調：「畀係人情唔畀係道理！」，面對群情洶湧的網民，事主於發布約10分鐘後刪除帖文，惟相關帖文截圖仍被網民轉貼至其他群組。

【無公德心】泊停車場淪晾衫架遭曬內褲 女車主怒斥：嘔唔嘔心啲呀！ 詳情即睇:【下一頁】

每朝索取《晴報》：精明生活．健康家庭．開心娛樂

撰文：林幸琦