【你值得擁有？】女友拍拖食飯奉旨男友付款 聲言「男人應份」港男不滿狂呻

食飯、睇戲相信是不少情侶的拍拖節目，不知大家又會否「AA制」攤分開支？一名港男日前在網上吐苦水，指與女友拍拖半年以來，大部分日常開支均由他自己負責。女友雖然也會間中送禮物或為他購買家居用品，卻堅持食飯不付款，甚至聲稱「男人應份幫女人畀食飯錢」、「佢值得擁有咁的男人」。對此，樓主擔心將來結婚、買樓及生活開支全由他一人負責，因而詢問一眾網民是否應要及早分手。

該名港男上周四（15日）在網上討論區「連登」以「女友食飯完全唔肯畀錢」為題發帖，指與女友拍拖初期，他曾向對方稱「想佢間中畀吓錢食飯，或者Share（分擔）吓」，卻遭對方以「覺得自己值得有一個幫佢畀晒錢的男人」為由拒絕。

結果指拖半年以來，9成以上的日常洗費都由事主負責。事主表示，女友並非完全沒出過任何錢，不過全部均是間中或不定期，

「咁佢都有間中買啲簡單家居用品畀我，生日時禮物都送得幾貴吓的畀我，同請我食自助餐……我都好多謝佢，不過覺得呢啲非必要同埋係日常生活之外。」

男友被嫌棄是「公屋仔」，港女大呻母親市儈：「叫我唔好諗住同佢結婚」，詳情即睇：【下一頁】

而他對女友的期望，是希望對方可以分擔部分日常拍拖食飯開支，「我只係想簡簡單單，例如食五餐佢請一餐，反而我唔祈求咩貴禮物。我同佢講間中請吓我食早餐，平平地都OK。」然而，女友卻再次拒絕其請求，

「佢極堅持一定唔會畀食飯錢，仲話男人應份幫女人畀食飯錢，佢值得擁有咁的男人之類，佢只會堅持用送禮方式嚟付出。」

對此，他直言自己「都係第一次聽呢樣嘢」，「值得有愛佢錫晒佢的男人就聽得多......我諗佢意思係佢覺得請食飯喺佢心中，（係）一個好重要表達愛的指標。」他擔心長遠下去，將來結婚、買樓、生活開支全由他獨力負責，「食飯畀晒都唔係問題，一百幾十，唉，但咁就因為錢銀而分手好似好戇X咁。」因此，他遂詢問其他網民意見：「想睇吓係咪好普遍，同埋其他男的會（如何）處理。」

網民籲分手：價值觀唔同

此事引來網民熱議，不少人認為事主與女友價值觀不同，勸他如果無法接受的話，不如盡早分手，「因為價值觀唔同，你想佢改，佢唔改，永遠都有條刺，唔會行得長」、「嘗試去改變一個人嘅根深蒂固嘅價值觀，只有接受佢或者分開各自各搵返適合自己嘅另一半」、「係要分就快啲分，唔好拖人哋幾年先來話分手」。

但亦有人認為，計較的其實是事主本人，「講到尾你都係計較嗰少少錢啫，冇錢就咪拍拖。」另有網民表示：「你覺得自己係愛佢，佢又愛你，又值得每次都係你畀嘅，咪繼續一齊。」

女友父母逆按單位養老，港男斥兩老不顧親情向女友獻計：「睇吓佢哋識唔識迷途知返」，詳情即睇：【下一頁】

每朝索取《晴報》：精明生活．健康家庭．開心娛樂

責任編輯：李凱晴