蘇玉華潘燦良結婚阿媽最高興 的起心肝簽紙全因一位朋友離世

蘇玉華昨日出席「卵巢健康行動」主辦的「蘇玉華籲社會大眾關注卵巢癌」新聞發布會，佢指自己定期都有做婦科檢查，對自己身體負責之餘，亦對身邊人有莫大益處，故非常鼓勵身邊朋友定期檢查。

{{hket:inline-image name="cad1b6c9-d4ff-4bf6-977f-6e60ce3c666f.jpg"}}{{/hket:inline-image}}

（《晴報》林良明攝影）

提起佢嘅身邊人，今年5月中蘇玉華終於同拍拖24年嘅男友潘燦良入紙註冊結婚，婚後第一次出席公開活動，蘇玉華指自己一早預咗記者會問註冊一事。被問到幾時擺酒，佢即刻表示唔會搞：「結婚同搞結婚係兩樣嘢，我哋係鍾意結婚。」

{{hket:inline-image name="3b6e8e95eb080ce6a43ed711f0f8efac.jpg"}}{{/hket:inline-image}}

（東星娛樂）

蘇玉華自認去到適婚年齡，終於有時間去完成人生大事，續披露當日上律師樓簽字過程，貫徹二人的低調作風：「我着咗條飄逸嘅白色裙，Causal得嚟又不失隆重，喺雙方家人見證之下簽字、交換戒指。」蘇玉華Sweet爆指同老公係天生一對。

蘇玉華指儀式之後佢哋仲去振興香港經濟，住咗兩晚酒店。笑言同老公一直都咁浪漫。佢表示疫情後都唔會特別去補Honey Moon：「去到呢個年紀就體會到，唔需要喺某日子做某啲嘢，我哋成日都會去旅行。」

{{hket:inline-image name="02371345feb873bdd9494a58c18edab8.jpg"}}{{/hket:inline-image}}

（東星娛樂）

今次即興登記註冊，蘇玉華指最開心嘅係媽媽，因為媽媽係一個好傳統嘅人，成日都話點都要個名分。蘇玉華自爆當日被爆入紙時都嚇一嚇，事關原來傳媒仲早過佢媽媽知道佢入紙：「完全唔知記者係可以Check到，記得嗰陣係同潘燦良食緊Lunch，一睇到新聞『大鑊』，當時媽咪係仲未知，即刻打畀媽咪同佢講我哋登記咗，唔想佢從其他人嘅口中知道，如果係佢實嬲死我！真係好驚險！呢個世界真係冇秘密，好彩係件好事！」

{{hket:inline-image name="7e9f6ad3d4055c9e0ec15b78992f333c.jpg"}}{{/hket:inline-image}}

（東星娛樂）

其實蘇玉華曾多次提到佢認為唔需要一紙婚書嚟維繫感情，亦非常滿意潘燦良嘅相處狀況。潘燦良亦曾自爆多次求婚，女友也答應了，但因為雙方都比較懶，不時會想結婚，但隔一陣又會擺低。加上佢哋都認定對方係餘生嘅另一半，已經係大家嘅家人，有冇結婚儀式都唔再重要。」

{{hket:inline-image name="ed8bf476c4d8e26ce3a61b239acd323b.jpg"}}{{/hket:inline-image}}

（東星娛樂）

二人的起心肝結婚，全因為一個朋友嘅離世。蘇玉華指佢朋友係一名男同性戀者，離世當日佢去到了醫院，而警察正在幫緊朋友嘅同性伴侶落口供，朋友嘅伴侶一見到佢就攬住佢喊：「佢當時喺我耳仔邊講嘅說話就係： 『我邊個都唔係！我唔可以幫佢做任何嘢，我唔可以幫佢簽任何嘢，我咩都唔係！』我當時個人震晒，太真實，太震撼。」

{{hket:inline-image name="90bb666fcdb6d33a00b0cffc794bc8a2.jpg"}}{{/hket:inline-image}}

（東星娛樂）

呢件事令蘇玉華不禁諗到佢將來同潘燦良是但一個有咩意外都唔知點算：「如果我唔可以幫佢簽紙，或者佢又唔可以幫我做任何嘢，咁點算呢？我覺得係一個最大嘅遺憾，我而家諗起都毛管戙。」她更說：「我哋不嬲都唔信奉嗰張紙，但係如果由另一個角度睇，所以我哋就結婚。」

撰文：黃蘊姿