【入行25年】鄭中基爆當年食「牛歡喜」內幕 憶醉酒鬧事黑歷史：失去好多嘢

鄭中基自從開咗YouTube頻道就不時拍片同網民分享私生活，近日佢同網紅「加蔥」合作，逐一解答網民問題，播出後3日已經累積8000多個讚好。

48歲嘅鄭中基已入行25年，出道後佢推出多張唱片，銷量好好。00年，佢喺飛往台北嘅航機上醉酒鬧事，扯空姐頭髮、用手叉副機長嘅頸，令飛機要急降阿拉斯加。最後佢被FBI拘捕，被判罰2,500美元兼留案底，自此佢形象受損，事業走下坡。片中，佢重提此事，並形容為人生最深刻嘅經歷：「以前唔會好深入諗問題，覺得唔好理喇，今日開心咗就算。喺嗰個年紀唔會諗到咁遠，就弊喇，嗰次教訓好大，突然間失去咗好多嘢。」不過佢認為嗰件事令佢成長咗好多：「諗返轉頭，嗰時個天待我不薄，冇要我死，只係好大力扑我一吓：『喂你好醒喇！再唔醒就唔得』」

{{hket:inline-image name="15.jpg"}}{{/hket:inline-image}}

(加蔥YouTube影片截圖)

{{hket:inline-image name="14.jpg"}}{{/hket:inline-image}}

(加蔥YouTube影片截圖)

後來鄭中基轉型為喜劇演員，令事業再有起色。拍過咁多部搞笑電影，佢話其中一部最鍾意嘅作品係《低俗喜劇》。戲中佢邊爆粗，邊食「牛歡喜（牛陰唇）」一幕，令人深象深刻，而鏡頭後嘅趣事就未必個個知，佢話：「大家以為我幾時鍾意加粗口就幾時加，其實每個粗口都係寫咗落劇本度，因為廣州人講嘅粗口用字同香港人係唔一樣，所以我要跟足劇本。」另外佢指戲中佢食嘅唔係「牛歡喜」：「唔知會拍幾多次，驚食太多，真正拍嗰時只係食豆乾，穩陣啲。」拍完套戲，佢去咗間賣牛雜嘅餐廳特登食：「好食，似牛筋腩、爽腩，少少韌、少少滑，唔潺。」另外佢又指戲中為咗加強搞笑效果，先會講「牛歡喜」一定要配鹹酸菜食，現實其實係配咩食都得。

{{hket:inline-image name="13.jpg"}}{{/hket:inline-image}}

(《低俗喜劇》電影截圖)

除咗《低俗喜劇》，鄭中基曾經同方力申、梁漢文主持TVB節目《美女廚房》，都係唔少人心中嘅經典。喺節目中，唔少女嘉賓被嘲笑煮嘢難食，甚至遭冠以「地獄廚神」稱號，但鄭中基就指佢哋某部分嘅評語係效果一部分，並非真心話：「嗰時我哋收到嘅指令就係，每一個都要話唔好，但其實有啲真係唔差，做效果囉。」

{{hket:inline-image name="11.jpg"}}{{/hket:inline-image}}

(《美女廚房》電視截圖)

{{hket:inline-image name="12.jpg"}}{{/hket:inline-image}}

(《美女廚房》電視截圖)

被問到鍾意唱歌定拍戲，鄭中基坦言鍾意做音樂，但佢認為拍多啲戲，可以令佢更易投入歌詞中，兩件事能相輔相成。佢透露現時忙緊重錄以前舊歌，同時會推出幾首新歌。佢指今次會唱熱戀時可以唱嘅情歌，等大家開心啲，唔使失戀先點佢嘅歌，真係有歌迷心！

{{hket:inline-image name="16.jpg"}}{{/hket:inline-image}}

(加蔥YouTube影片截圖)

{{hket:inline-image name="17.jpg"}}{{/hket:inline-image}}

(加蔥YouTube影片截圖)

撰文：張芷晴
責任編輯：楊安莉