【稅率懶人包】移民前你要知 一表睇晒外國稅率有幾高？

無論你因為乜嘢原因想移民，有一樣嘢去到邊都擺脫唔到，之唔係交稅囉！全球幾乎所有國家都會徵收薪俸稅（係有例外，文章最後會介紹）。以下用一張圖列出一般移民目的地嘅薪俸稅最高邊際稅率，即係屬於高收入嘅人士，最高需要交幾多%薪俸稅。作為參考，香港嘅標準稅率係15%，累進稅率最高17%。好，去圖！

{{hket:inline-image name="0907WLfeaturepageOK2.jpg"}}{{/hket:inline-image}}

▲資料來源：KPMG

雖然好多國家稅率都睇落好高，但其實同香港一樣，人哋都有免稅額，如果收入未達到某個水平，就唔需要徵稅，例如好多港人去嘅澳洲，如果成為澳洲稅務居民，年度入息唔夠18,200澳元（約10.5萬港元），就係唔需要交稅，不過移得民都唔會得咁少收入啦（退休例外）！

歐洲稅率平均最高 有一個國家例外

綜合最高稅率地區當然係歐洲，好多都接近50%水平，但係歐洲一向標榜高稅率高福利，而有錢人一般都會聘用稅務顧問，睇吓點樣報稅先最抵，特別係移民人士可能有海外收入，例如香港層樓租出去嘅租金收入，理論上係需要報稅，一定要留意。而眼利嘅讀者，會發現有一個歐洲國家稅率竟然不合比例地低，而且仲係人均收入排名世界前列嘅瑞士。瑞士同其他歐洲國家「高稅率高福利」相反，而係行「低稅收低福利」，生活物價指數又高，而且教育同醫療都超級貴，講起有啲似曾相識，情況同香港都有啲似。

最後介紹人間真正嘅「零稅天堂」，名單包括汶萊、巴林、沙特阿拉伯、阿曼、科威特、百慕達、開曼群島、巴哈馬。心水清嘅讀者，都睇到有幾個係常見嘅公司註冊地名，例如位於加勒比海嘅開曼群島就係出名「三零」──零入息稅、零利得稅、零公司所得稅。至於中東亦有唔少國家上榜，可能當地政府靠石油已經賺大把錢，唔需要國民納稅都得。

=============

接收全方位穩健財富管理資訊，請讚好「健康財富 Wealthy Life」Facebook：https://fb.com/Wealthylifehk/