【勿亂評他人】一年工作「真空期」被懷疑坐監 人夫見工被迫回憶喪子傷痛 為愛妻停工

凡事切勿只看表面。一名在大公司人事部（HR）工作的女子，日前在網上分享一則印象深刻往事。她指出，數年前一名應徵者條件十分合適，唯獨是出現整整一年的「真空期」，原因是「屋企有事」；經轉介部門主管進行第二輪面試前，對方不但不相信，更暗中向她表示「有冇諗過佢係坐監」、「唔慌好人」。及後應徵者前來面試時，在部門主管咄咄逼人下，只好道出傷心的殘酷往事。

Facebook專頁「辦公室日報」今日（4日）刊登化名「想轉行的Y小姐」的投稿，在大公司人事部工作的Y小姐表示，早前有位化名Sam的男同事遞信離職，令她憶起3年前，對方經獵頭公司引薦前來見工的往事。

她憶述，當年經第一輪與Sam單對單面試後，覺得對方不錯，「所以我叫佢等等，搵埋部門主管入嚟再in」；惟當部門主管看畢Sam的履歷表（CV）後，十分介意其一年的「真空期」。她向對方解釋Sam要照顧身體不適的家人後，反被部門主管斥責：

「佢講你就信呀？一年冇返工喎！你有冇諗過佢係坐監，可能坐完一年出嚟呢！」

於是她向部門主管指出，Sam的申請表標明沒犯罪紀錄。未料，部門主管竟表示：「屋企人咩唔舒服要照顧全年呀？好誇張喎，定係之前畀人炒咗咋，古古怪怪咁，都唔慌好人。」

5旬高層人夫疫情下被裁，搵工屢碰壁用儲蓄供樓，為養家放下身段做「步兵」送外賣，詳情即睇：【下一頁】

至第二輪面試時，Sam的學歷、經驗、過往工作細節等環節全部過關後，部門主管開始詢問Sam為何有一年「真空期」；Y小姐形容，雖然部門主管「客氣咗，起碼冇兜口兜面質疑人哋坐過監」，但仍然咄咄逼人：

「一年喎Sam，我覺得有啲奇怪囉，就算係我爸爸媽媽病咗，我都唔會辭咗份工，再一年唔做嘢去照顧佢哋啦，唔係話唔孝順呀，咁都要食飯嘛，一年時間照顧屋企人呢part真係咩？呢個位我諗唔明。」

對此，被Y小姐形容「有修養」的Sam選擇詳細回答。他表示，一年前太太分娩時情況不佳，要打強肺針幫BB出世，再送往深切治療依靠呼吸機；而太太當時亦需要他在身邊陪伴，於是他便辭職，「後來BB都係唔得，因為器官衰竭，我太太好傷心，產後抑鬱，我相信請人返嚟睇住佢唔係最好方法，我驚佢有事，所以一直照顧到佢情況穩定，至於錢方面，我用緊以前積蓄，而家安頓好，太太又ok，我就搵嘢做。」

至3年後Sam辭職，Y小姐忍不住問他「搵到工未」，並表示「其實你阿head唔易頂，當年我以為你唔take offer（取錄）」。對此，Sam表示已找到一份人工與福利更好的工作，並坦言：

「冇計啦！鬼叫要食飯咩！嗰陣時山窮水盡㗎喇，忍屎忍尿都係為咗我老婆咋。」

在文末，Y小姐斥責當年部門主管逼Sam覆述痛失愛兒的經歷十分殘忍，「可能真係有傷害到阿Sam都唔奇」；至於該番「係咪坐過監」的言論，她亦從未向Sam提及，「只希望個部門主管明白一個道理：未知全貌，不予置評，你唔了解別人，就唔好亂咁評價別人。」

港男有案底失業難養家終獲聘，暖心HR：要畀機會人改過 ，詳情即睇：【下一頁】

內容獲「辦公室日報」授權轉載。

每朝索取《晴報》：精明生活．健康家庭．開心娛樂

責任編輯：李凱晴