內地老夫老妻57年乜都AA制 離婚後AA買最後一樣嘢令人爆笑

內地新聞節目報道，天津有一對八旬老夫妻，結婚57年生活一直行AA制，屋企用品食品全部各用各，唔共同，連雪櫃入便嘅雞蛋都要分開放兼寫名。呢對「長相『撕裂』，白頭到老」嘅夫妻，今年7月底終於成功離婚，最後佢哋AA制買一樣嘢賀成功解脫，令人哭笑不得。

6月初內地有新聞節目報道，天津一對老夫老妻－劉爺爺（86歲）同馬婆婆（84歲），兩人1963年登記結婚，結婚57年期間經常鬧交，多次要報警調停。節目上門探訪佢哋屋企時發現，佢哋長年實行極限AA制，唔單只分房瞓，所有生活用品同食品都一定劃清界線，從來唔會同用。夫婦平時輪流煮飯，雪櫃上層屬於爺爺，而下層屬於婆婆、菜刀各自有一把、雞蛋都要做寫名標記等等。馬婆婆成日埋怨丈夫長年唔照顧佢，以前曾經因為抽氣扇壞咗，叫丈夫爬高修理，點知被質疑「你想摔死我嗎？」。

{{hket:inline-image name="0831WLfeaturepage545.jpg"}}{{/hket:inline-image}}

▲兩夫妻57年來都實行AA制，乜都各用各，唔共同，連雞蛋都要做寫名做標記。（來源：微博）

劉爺爺仲喺節目度話：「我這半輩子最大的心願就是要離婚，結束這惡夢般的生活」。雖然兩個人關係惡劣，但又一直未離婚，究竟點解呢？其實佢哋曾經鬧過3次離婚，但最後都唔成功，原因同好多離婚搞到上法庭嘅夫妻一樣，之唔係為層樓囉！

{{hket:inline-image name="0831WLfeaturepage544.jpg"}}{{/hket:inline-image}}

▲拿到離婚證的馬婆婆對記者說：「離婚快樂，我一定要去吃喜麵！」（來源：微博）

因為兩個人住緊個物業，屋契上只有丈夫個名，婆婆擔心爺爺離婚之後賣屋，自己無家可歸，又無錢分，於是堅持要喺物業上加自己個名先肯離婚，但爺爺就驚加咗婆婆名之後反口唔離，但係婆婆堅決要「加完我先離」，最終喺法官調解下，爺爺終於接受「加名後離婚」方案。

{{hket:inline-image name="0831WLfeaturepage546.jpg"}}{{/hket:inline-image}}

▲呢對怨偶真係有心，「分別」訂製錦旗送俾幫佢哋離婚嘅法庭人員，成兩幅咁多，收咗都唔知掛喺邊。（來源：微博）

7月27日，呢對怨偶終於成功離婚，仲上埋天津法院網站頭版新聞。最頂癮嘅係佢哋兩個好有心，為咗致謝幫手辦理離婚嘅法官同法庭工作人員，兩人「分別」訂製咗錦旗送俾法庭人員，有網民就話佢哋連最後買嗰樣嘢都係AA制，唔肯「些牙」，果然貫徹始終咁話。

編輯：唐婉琦

接收全方位穩健財富管理資訊，請讚好「健康財富 Wealthy Life」Facebook：https://fb.com/Wealthylifehk/