【過街英雄】黃翠如「僭建」巨胸扮俏秘書查案 鹹濕老細江榮暉落搭下場超慘

《過街英雄》最新兩集講私家偵探宋凱甄（黃翠如飾演）要調查辦公室性騷擾，於是扮成秘書混入公司，埋鹹濕老闆黎生（江榮暉飾演）身。黎生望住宋凱甄嗰陣，眼神色迷迷，唔少網民都大讚佢好好戲。數數手指，原來江榮暉已經入行超過30年，係TVB其中一位綠葉王。

{{hket:inline-image name="12.png"}}{{/hket:inline-image}}

(《過街英雄》電視截圖)

劇情講述鹹濕老闆黎生好鍾意趁人唔為意時非禮女仔，眼明手快，受害人眾多。為咗查案，宋凱甄出盡渾身解數，例如將聲線拉高八度、「僭建」胸部、著緊身短裙，扮成俏秘書，接近黎生，望對方露出真面目。

{{hket:inline-image name="11.png"}}{{/hket:inline-image}}

(《過街英雄》電視截圖)

{{hket:inline-image name="13.png"}}{{/hket:inline-image}}

(《過街英雄》電視截圖)

黎生每次同宋凱甄交代公事，一開始都正正常常，之後就會忍唔住瞪大雙眼望實佢胸部、臀部，講嘢都講到口震震，擺明對佢有興趣。然而當佢想出手時，佢老婆黎太（袁潔儀飾演）突然入房，表明要嚴密監控佢，令佢難以向宋凱甄揩油。

{{hket:inline-image name="14.png"}}{{/hket:inline-image}}

(《過街英雄》電視截圖)

後來唐亮星（森美飾演）、Nadia（譚凱琪飾演）用計使走黎太，黎生一接到宋凱甄電話，即刻返公司，諗住終於有出手機會。黎生一見到瞓喺梳化嘅宋凱甄，馬上望住佢條腿，仲不斷吞口水，睇到心癢癢。佢打算出動「鹹豬手」時，宋凱甄突然放屁，嚇到佢逃離房間。

{{hket:inline-image name="15.png"}}{{/hket:inline-image}}

(《過街英雄》電視截圖)

最後宋凱甄偷偷熄咗公司總掣，帶黎生摸黑入房，將佢綁喺椅子上，為佢蒙眼，引導佢講出真心話。黎生以為面前嘅人係宋凱甄，坦言為錢先會同老婆繼續一齊。黎太聽到嬲到不斷打佢，其他女同事都加入，力數佢嘅非禮罪行，不斷圍摑佢。

{{hket:inline-image name="16.png"}}{{/hket:inline-image}}

(《過街英雄》電視截圖)

{{hket:inline-image name="17.png"}}{{/hket:inline-image}}

(《過街英雄》電視截圖)

唔少網民睇完都大讚江榮暉好戲：「佢做到嗰個感覺，眼神好有戲」、「佢表情真係好到位」等。原來江榮暉現年已經52歲，佢畢業於第14期無綫藝員訓練班，同期藝人有麥長青、林家棟、郭富城、黃德斌等。入行33年以來，江榮暉擅長演奸惡之徒，拍劇產量唔少，如《義不容情》、《卡拉屋企》、《城市故事》、《好心作怪》、《全職沒女》等，近年仲有喺《愛回家》飾演林忠有。

{{hket:inline-image name="18.png"}}{{/hket:inline-image}}

(《義不容情》電視截圖)

{{hket:inline-image name="20.png"}}{{/hket:inline-image}}

(《卡拉屋企》電視截圖)

除咗幕前演出，江榮暉亦係明星足球隊成員，曾經去上海比賽，同黃日華特別友好。

{{hket:inline-image name="19.png"}}{{/hket:inline-image}}

撰文：張芷晴
責任編輯：楊安莉