【我要做業主】80後港女千幾呎屋分租13個單位 每月收入近7萬 目標40歲退休

由胡諾言、林秀怡同彭慧中主持嘅TVB節目《我要做業主》，最新一集邀請咗位80後嘅女仔Kathy嚟做嘉賓。未夠30歲嘅佢已經好有遠見，除咗靠打工主動收入外，亦想用投資增加被動收入。依家30出頭嘅佢朝早返正職，夜晚搖身一變成為包租妹，一個人管理16個租客，今集佢會同大家分享上車同投資心得。

{{hket:inline-image name="12.jpg"}}{{/hket:inline-image}}

(《我要做業主》電視截圖)

Kathy係位專業人士測量師，2016年佢以360萬買入荃灣一個單位，做9成按揭。3年後，物業升值咗近200萬，佢將所賺到嘅資金再買入另一個位於尖沙咀嘅千幾呎舊樓。

{{hket:inline-image name="15.jpg"}}{{/hket:inline-image}}

(《我要做業主》電視截圖)

Kathy將呢間千呎屋分成13個單位，每個單位房租4000至7000蚊港幣，每月嘅總租金收入高達68000蚊港幣。被林秀怡問到如果唔分租13個單位，而係成間千呎屋租出去會收幾多錢租金，Kathy表示30000至40000蚊港幣左右，收入相對地會較少，所以佢最後選擇分租：「投資分租生意回報好啲，亦都睇到香港人返工路程好長或者工作時間好長，佢哋都好想喺市區搵個細細哋，舒服嘅地方住，假期先返屋企同家人生活，我就睇中呢個市場。」

{{hket:inline-image name="17.jpg"}}{{/hket:inline-image}}

(《我要做業主》電視截圖)

{{hket:inline-image name="13.jpg"}}{{/hket:inline-image}}

(《我要做業主》電視截圖)

{{hket:inline-image name="14.jpg"}}{{/hket:inline-image}}

(《我要做業主》電視截圖)

Kathy有正職，又有收租，佢揚言目標係喺40歲退休，希望唔使做嘢都有錢收，隔籬林秀怡即時臉露驚訝表情。不過Kathy話作為一個包租妹最重要係人情味，唔好賺到盡，所以佢對租客非常好。如今13個單位都係在職人士，有酒店、白領、銀行等行業。佢嘅租盤全包水、電、wifi同各項雜費外，佢仲會為租盤擔任打掃清潔、維修、「社工」等崗位。

{{hket:inline-image name="16.jpg"}}{{/hket:inline-image}}

(《我要做業主》電視截圖)

{{hket:inline-image name="18.jpg"}}{{/hket:inline-image}}

(《我要做業主》電視截圖)

點解話Kathy係「社工」？因為佢成日幫助租客解決問題，佢話：「有個租客同我講失業2個月，下個月唔再租。我叫佢等佢搵到工再攤分還租金，依家先全力去搵工。我仲幫佢睇CV，又幫佢睇搵工網，過咗冇耐佢就搵到工，可以繼續租。」林秀怡大讚：「咁好嘅呢個包租妹，通常我話冇錢，啲業主即刻趕我走。」另外，曾經有名外籍租客因為違反租約而被Kathy勸離，該名租客好唔開心，拎行李上天台，最後Kathy幫佢搵新業主，仲帶埋佢睇租盤，認真唔話得。

最後Kathy有啲小秘訣提醒想搞分租生意嘅人：「收租就收平市價啲啲，咁租客都會將所有嘢錫住嚟用，都會驚業主唔再租。同埋搵代理做嘢時要畀足錢，又足又快。」

撰文：張芷晴
責任編輯：楊安莉