藝人平日總會以最佳狀態示人，不過大家睇到嘅都只係表面嗰一「浸」，其實佢哋拍劇同做其他工作嘅時候，都會有唔少惡劣嘅狀況，令佢哋非常狼狽，真係有苦自己知。
黎耀祥難忘拍《西遊記》流鼻涕裝滿假鼻
黎耀祥拍劇多年，遇過不少辛苦事，而令佢最深刻記憶嘅係拍攝劇集《造王者》及《西遊記》遇到嘅狀況。
《造王者》劇照
祥仔拍《造王者》去到西貢拍外景，環境都幾惡劣吓：「嗰個地方好多沼澤，仲要拍幾日，環境又濕又熱又多蚊，仲要着囚衣拍攝，由朝拍到晚，雖然都仲有少少時間可以返屋企沖個涼，但係有時通告太密，索性喺公司瞓一覺再開工。」
《西遊記》劇照
至於《西遊記》中祥仔嘅豬八戒經典造型，相信觀眾睇到都戥他辛苦，祥仔表示拍《西遊記》嘅時候真係好辛苦，加上當時又夏天，豬八戒嘅造型每次都要用個幾鐘化妝，不過最慘都係有一次拍攝撞正傷風：「不停流鼻水，因為戴住個假鼻嘅關係，啲鼻涕係個假鼻入邊琅琅下，我要用紙巾塞入個鼻窿吸啲鼻涕出嚟。」雖然咁辛苦，但祥仔就話自己冇諗過唔拍古裝：「其實時裝同古裝都各有各好玩，唔會因為少少辛苦就突然間唔想拍嘅，尤其當拍攝出嚟效果好好，觀眾又睇得開心，就算幾辛苦都係值得。」
祥仔笑言拍《殺手》連場打戲都相當吃力。（黎耀祥IG）
高海寧幾度拍淋雨戲
高海寧覺得拍劇最辛苦莫過於冬天拍淋雨戲，佢最記得就係拍《BB來了》同黎諾懿喺中環拍一場淋雨戲：「我好記得當晚好凍，得幾度，周圍個個都着晒羽絨，但係我只係得件白色恤衫，唔知淋落嚟嗰啲係地下水定係水車水，總之兜頭淋凍水真係好攞命，啲水冰到不得了，唔係淋冰水咁簡單， 只係淋咗2秒，我同諾懿已經凍到講唔到對白，嗰次真係辛苦到.....我甚至忍唔住大嗌『我退出，唔拍啦！』拍完仲要成身不停咁震，卒之都病咗。」
《BB來了》截圖
佢話最慘就係後來監製話要補拍呢場戲，佢聽到之後當堂嚇一跳，同監製講唔好再拍，好彩最後都唔係補拍淋雨嗰一幕。
《BB來了》截圖
何遠東疫情期間瞓身浸「污水浴」
近年喺無線頻頻出鏡嘅何遠東自言十分捱得，拍劇遇過多個難捱嘅場口亦毫無怨言： 「最近啱啱拍完劇集《一笑渡凡間》，其中一場戲去到南生圍拍攝，當日咁啱落完雨，好多蚊，又好熱，加上拍古裝戲，有場戲要我成個人瞓落啲污水度，當時對鞋入晒污水不特止，仲成對鞋都係雜草，其實都真係好難頂，尤其衛生環境真係好惡劣，加上拍攝嘅時候正值疫情爆發，所以每次拍完一個場口都會全身消毒，最慘係有時嗰場戲整到成個身污糟晒，萬一NG的話就要成個人整乾淨，然後再污糟多一次，其實仲難頂！」不過何遠東話好彩自己好少NG，拍劇都會長期追求一take過。
何遠東笑言反正辛苦，捱一次好過辛苦多一次。（網上圖片）
菊梓喬於「垃圾房」工作
菊梓喬(Hana)加入娛樂圈短短日子已獲得最受歡迎女歌手獎，不過佢入行前就試過喺猶如垃圾房嘅環境工作。
Hana指自己原本去到一間公司度做part-time sales，但後來發覺自己唔鍾意對客，於是同老闆講想入倉做，點知原來倉入面嘅環境非常差：「成個倉只係得一條好窄嘅路可以行，雖然我好瘦，都要側身先行得過，每日就係咁樣嘅工作環境下做九個半鐘，食飯、去廁所，都喺呢個環境下解決，甚至有一陣臭味，老鼠曱甴經常喺身邊出現，而我一個女仔好多時都要捧住幾個麻包袋搬嚟搬去。」
（網上圖片）
不過Hana居然可以喺咁惡劣嘅環境下做足4個月：「以前我係一個唔知自己做緊乜嘅人，難得有一間公司肯請我，所以都即刻返工。」Hana話覺得嗰幾個月自己好似喺垃圾房入邊做嘢咁：「有時攰到挨喺啲貨度休息，嗰種感覺到依家仲好記得，雖然辛苦，但總算係一種經歷。」
曾經捱過的Hana，份外珍惜現有的一切。（Hana IG）
採訪：Pauline