【出口傷人】兩孩港媽遭男家人身攻擊 被取笑生得矮影響下一代 大嫂一個動作極侮辱

切勿胡亂出口傷人！一名兩孩港媽日前在網上吐苦水，指自己經常被丈夫家人人身攻擊，取笑其身形矮小繼而影響小朋友，「成日話我啲仔女細粒，話佢返小學實排第一咁」，而大嫂更曾當眾作出侮辱之舉。對此，她感到十分無奈，幸獲一眾網民留言支持。

該名港媽周二（18日）在網上討論區「親子王國」以「男家人生攻擊」為題發帖，指自問自己生得矮，但丈夫身高亦只屬一般；惟每當返男家時，眾人都會對她作出人身攻擊，

「成日話我啲仔女細粒，話佢返小學實排第一咁，我心諗，咁係又點姐？」

她直言奶奶亦屬「矮人」，對方心中「實會覺得自己個仔（即我老公）高囉」；而丈夫的大嫂亦生得高大，「佢哋啲仔女都高嘅，就成日話我啲仔女細粒，係返我奶奶家先會咁畀佢彈囉，我娘家果邊唔會咁講㗎！」有一次，其大嫂更在小朋友面前作出侮辱之舉，

「我老公阿嫂大份，高過我，試過抱我個女，問佢係咪未試過咁高囉，好賤囉！」

對於男家說話毫不尊重人，事主直斥「會開口講呢啲野嘅人，多數講野都唔經大腦」，亦不會理會是否傷害別人自尊心，「其實我啲仔女不嬲係佢哋自然感覺下呢，唔係咁鍾意返我奶奶度囉，細路仔你對佢係好定唔好，你估佢真係唔知咩。況且，句說話其實係想攻擊我囉，又想話我矮累街坊，又想話我湊得唔好……」

她又指出，雖然自己一人照顧兩個小朋友，完全沒有假手於人，但奶奶仍然對她永遠沒有一句認同，「真雞蛋裏挑骨頭咁，唔好講話湊得好唔好啦，我覺得佢係估唔到我湊到兩件，從來冇要佢幫囉，即係冇畀佢睇死。」

網民：最好叫佢唔好喺小朋友面前咁講

此事引來網民熱議，不少人留言支持事主，「當耳邊風，再講就反擊」、「答奶奶：係呀，好矮細似足你」、「最好叫佢唔好喺小朋友面前咁講啦，會傷自尊心㗎嘛」、「為母則強，做自己能力可做的事。後天比多啲營養運動及早睡，都有助仔女發育。盡力做，不需要怒」、「當你不需要靠男家的人幫手，而你做得好過人地就已足夠。人哋眼紅你先多嘢說」。

每朝索取《晴報》：精明生活．健康家庭．開心娛樂

責任編輯：李凱晴