【奶奶恐懼症】同住數年搬出仍未逃出魔掌 奶奶每逢周日上門「幫手」湊孫 港媽反變工人「媽寶」老公話...

相信大家每逢假日，都會想輕鬆悠閒地慢活，好好休息。一名港媽在網上吐苦水，指與丈夫曾與奶奶同住數年，期間十分「惡頂」；雖已搬出，但每逢周日家中外傭放假，奶奶都會上門「幫手」湊孫，卻令她變成工人服侍奶奶，「媽寶」丈夫更是懶理。對此，她大嘆道：「唔想奶奶過來呀……對我來講：佢過來我仲忙！」

該名港媽日前在網上討論區「親子王國」以「唔想奶奶過來呀」為題發帖，指自己理想的周日，是希望可以與丈夫、小朋友輕鬆一下，「原本工人放假，我終於可以同小朋友享受吓自己一家幾口的私人時間！……剩係想星期日屋企簡單準備早午餐，晚餐就食外賣算。」然而，奶奶每逢周日卻會上門「幫手」湊孫，令她大為苦惱，

「奶奶好小心眼，我做咩佢都好似起後面（望）住我咁！」

她指出，每逢周日為了迎接奶奶，她除了要準備多種生果外，更不能食外賣，要煮足一日三餐，有時奶奶更要求她煲湯，

「煮完又要洗，洗完又要洗奶樽等等......變左好忙囉……工人唔喺度，我真係唔想做！但奶奶過來（阻）住晒！……奶奶過來我大壓力同埋忙好多，唔覺幫到手」

雖然她不想奶奶上門「幫手」，但丈夫卻十分期待，「我老公都唔知幾想佢阿媽來！工人放假，老公第一句就話阿媽聽日過來幫手！」她指出，自己明白丈夫愛錫奶奶，而奶奶上門探望孫兒亦屬正常之事，但其內心卻十分抗拒，只因以往曾與奶奶同住幾年，令她有「奶奶恐懼症」；雖然已搬出，但「有段時間每晚煮咩煲咩都影相send畀佢」，

「因為奶奶太煩了，有點強迫症，同埋次次來親我屋企，次次都話我屋企嗰樣有問題，呢樣唔好咁！連我間房放啲小朋友相都話唔好！我返工對住老細都無對住我奶奶咁大壓力。」

她又指出，因為新冠肺炎疫情嚴重，所以連自己媽媽亦甚少見面，而媽媽亦著她不要帶小朋友外出。但反之，奶奶所住屋苑有兩宗確診個案，雖曾與對方表示自己周日「搞得掂啲小朋友」、「疫情廢事又搭車」，著奶奶不要上門，但對方仍然堅持；更甚者，

「姑仔個女生日都全家族10幾人以上都出席……仲要佢哋住的屋苑有確診，佢哋親自過來接埋我幾個小朋友過去慶祝！我個女生日我老公又叫埋佢地成班人過來，唉！同老公講疫情點點，佢又畀悔氣說話我聽。」

網民大表同情：等你老公照顧返自己呀媽

此事引來網民熱議，不少人大表同情，「其實叫工人禮拜五六搞掂晒家務然後禮拜日你叫外賣就得啦，咁仲邊使人幫手」、「現在疫情咁嚴重夠煩死啦？仲畀啲老人家走來搞搞震？」、「有啲奶奶係好唔識做，好鍾意咩都理」、「你咁聽話，佢梗係點你啦」、「老實，你老公要負最大責任」、「同你老公表達吓，唔係本意好就無敵，呢啲叫道德綁架」。

同時，亦有網民建議道：「其實都幾難搞，你同你老公意見唔一致。搵個星期自己出街，將啲嘢交畀你老公做，等佢自己照顧自己呀媽，承受返自己阿媽帶嚟嘅麻煩。」

延伸閱讀：

【婆媳糾紛】奶奶氹生仔承諾退休湊孫卻反口 新抱陷兩難患情緒病【查看詳情】

【意見多多】婚後姨媽姑姐狂催生仔 被指「唔生點算稱職老婆」 港女一招令親戚主動收聲消失【查看詳情】

每朝索取《晴報》：精明生活．健康家庭．開心娛樂

責任編輯：李凱晴