【新冠肺炎】貪方便樣本瓶亂交診所 港女被拒收拉低口罩報復 向姑娘呼「真氣」：下個中嘅係你

本港第三波新冠肺炎疫情持續，市民可前往醫管局指定的22間普通門診診所取樣本瓶，並在指定時間內交回。然而，一名女子日前卻貪方便，將樣本瓶亂交給非政府指定的診所，但被拒絕收；更令人側目的是，她竟憤而拉低口罩，向姑娘呼氣報復：「下個中嘅係你呀！」

診所女助護「珍寶豬」昨日（11日）在其Facebook專頁「診所低能奇觀」發文分享，指近日一名女子走入診所後，便將樣本瓶放在登記處枱面，準備轉身離開；她見狀後立即叫停對方，指出樣本瓶需交往指定收集點，著對方拿走。

未料，該名女子反指事主「好得閒」，要求她「幫忙」將樣本瓶交往指定地點：

女子：「係你做㗎啦，我唔得閒去嗰啲咩指定呀，我仲要去返工㗎，我唔就腳㗎。」

事主：「我哋唔收㗎，冇人嚟同我哋收㗎，你都係要自己攞去呀。」

女子：「你聽唔明我講咩呀？我好忙㗎。我唔係好似你咁得閒㗎！你都係坐喺度啫，你拎去啦！」

女子語畢，再次轉身準備離開；此時，事主只好使出「殺手鐧」，向對方表示：「你唔自己拎走嘅我由得佢㗎啦，掉㗎啦！」；女子聽後立即轉身，大呼「喂，個嘢唔易攞㗎」。事主回答道：「我知呀，所以你應該自己攞去呀，一係你就用上門收服務，但係嗰個你要自費。」未料，女子隨即走近並拉低口罩，向事主呼氣報復：

「下個中嘅係你呀！」

此事引來網民熱議，不少人認為女子橫蠻無理、十分過分，「呢啲人唔駛驗啦，無得醫㗎啦，唔好麻煩人了」、「對住佢個口噴火酒，消毒殺菌」、「狗眼看人低，佢份工幾十萬上落咩」。同時，亦有不少網民著事主報警處理，「嘩，佢『霞』嗰口氣報警拉佢啦」、「依種行為已經觸法了，可以報警處理」、「佢個樽有資料，報警可以查到」。

文章獲「診所低能奇觀」授權轉載

每朝索取《晴報》：精明生活．健康家庭．開心娛樂

責任編輯：李凱晴