【最強後盾】疫情下公司無生意 打工仔憂被解僱崩潰大喊 獲慈母一番話開解重新振作

受新冠肺炎疫情影響，不少公司或因業績不理想需要裁員。一位「打工仔」指公司因疫情生意愈來愈差，自己每日被上司訓話、面臨失業危機，壓力「爆煲」下終在家中崩潰痛哭，母親得悉後耐心開導，令事主釋懷，再次充滿動力堅持下去。

網民「為生活打拚嘅小薯」上周五（7日）以「家人嘅支持好重要」為題，向Facebook專頁「奴工處」投稿，表示其公司最近受疫情影響，生意一落千丈，自己幾乎每天被上司責罵，甚至因擔心被公司裁員而壓力「爆煲」，形容：

「大壓力到對住部電話冇啦啦喊咗出嚟。」

母親見狀立即追問何事，事主亦一五一十道出自己的困惱。出乎事主意料的是，母親不但未有說教或指罵，反而安慰事主：

「寧吃開眉粥，不吃愁眉飯。市道差搵工難媽咪明嘅，但媽咪唔想你因為份工而做壞個身體，你唔使擔心屋企，份工做得唔開心就轉咗佢啦，媽咪支持你！」

事主聽畢母親一番開解說話，形容自己馬上「放鬆咗」，更充滿動力繼續工作，揚言：

「決定再堅持一陣先再放棄！」

不少網民看到帖文後，均讚揚事主母親通情達理，亦留言為事主打氣，「有家人做背後嘅盾真係好重要」、「精神健康都係健康嘅一種」、「好媽媽，朋友，你要加油」、「伯母好有智慧，如果為咗份工持續地影響到情緒，其實真係蝕多過賺，記得唔好死頂啊」。

另有網民分享自己的經歷，「我都試過返一份工做到凌晨3、4點，第二日10點繼續開工，我媽咪見到咁，同我講屋企唔係等你舊（嚿）錢開飯，主動叫我辭職」、「你屋企人真好，我冇工返後2個月，我媽已不斷叫我搵工或搵嘢學，之後我學美甲，學咗一堂我媽就話好搵唔搵，搵埋啲無謂嘢去學，正正經經搵份工做好過」。

文章獲Facebook專頁「奴工處」授權刊登。

每朝索取《晴報》：精明生活．健康家庭．開心娛樂

撰文：蘇麗儀