【2017年曾患大腸癌】 林利患癲癇症多次徘徊鬼門關 每次發作「斷片」惜無藥可醫

53歲的前小虎隊成員林利，曾經在2017年患大腸癌，慢慢康復的他坦言想要回歸平淡生活。而林利在接受本報訪問時，首次親自剖白自己有癲癇症多年的經歷，更希望借分享自己的經歷去鼓勵患者。 

{{hket:inline-image name="4.jpg"}}{{/hket:inline-image}}

（圖片：《晴報》黃紫維攝）

林利獨自克服了癲癇症幾十年，更曾試過因癲癇症發作而令身體受傷：「癲癇就係腦部不規則咁放電，其實對我嚟講係好大嘅障礙，因為怕光怕嘈，呢幾十年都要面對克服呢個問題。又因為癲癇係無得醫，要靠食藥控制，好容易畀環境影響而發作。其實做呢一行係好辛苦，要係人群中表演，但我都慢慢去克服。如果發作嘅時候坐係度就無事，如果企係度就會劈啪跌落地，試過頭同眼都要縫針，身體會受傷，都幾辛苦吓，好難用言語去解釋呢個係咩病。」他更指因為有這一個病，成日都一個人去公園，又好少去聚會。

{{hket:inline-image name="43.jpg"}}{{/hket:inline-image}}

（圖片：林利facebook）

他憶述自己成日都要出入醫院，又睇過好多醫生：「成日都入醫院，發作嗰半個鐘頭無記憶，但幾個鐘頭後就無事。其實都睇過好多醫生，照過腦電波又做過磁力共振等，都照唔到嘢，只有藥物去控制，食咗個人會緩慢啲，但我一路都冇食。」不希望依賴藥物的他又指：「平穩嘅生活，唔好咁頻撲，就醫好咗我。」

{{hket:inline-image name="83663527_10222850290512813_3176410108196290560_n.jpg"}}{{/hket:inline-image}}

（圖片：林利facebook）

林利指：「很多人都有呢個病，有啲天生，有啲後天，後天都係因為壓力大導致精神上嘅問題。我都問過晒醫生，又唔係好大嘅一個病，同正常人一樣，係好睇生活環境。」不過林利就坦言自己未試過在工作期間發病：「發病時都多數係街、機場等，呢啲通常都冇咩太大症狀，未試過影響拍劇唱歌。」但他直言自己要比其他人用多十倍嘅力去踏上舞台，「因為我會比較緊張，但上到台就無事。」

{{hket:inline-image name="78818098_10222341205346002_534849283349177958.jpg"}}{{/hket:inline-image}}

（圖片：林利facebook）

在這幾十年間，林利表示偶爾都會發病，有時幾年都不會發作，但有時一年有兩三次。「所以呢二、三十年都係生死邊緣行過，對生老病死有好大感觸，因為自己成日瞓喺急症室張床，好似靈魂飄走咗咁嘅感覺。」他續指：「我係一個對感情同工作都好易上心嘅人，所以反而唔好，應該放輕鬆去做，其實我都唔適合做呢行，但都做咗咁耐，都過去啦，咁後面就漫活去生活，發作機會都低啲。」

林利更指之前娛樂圈中經歷的起起伏伏，加上經常入醫院，「我覺得寫兩本書都唔知寫唔寫得晒，因為實在太多經歷唔係一般人會有。癌症個啲已經算普遍，但呢啲咁隱性呢種病我唔講冇人知，所以成日都要自己承受，除非係身邊嘅人，好似太太見過我幾次發病，連媽媽都未必知。」

{{hket:inline-image name="70852734_10221580839537332_5392762581830074368_n.jpg"}}{{/hket:inline-image}}

（圖片：林利facebook）

不過自從上年和台灣太太Erin結婚後，林利指與太太一起是最放心的時候：「因為同太太一齊做網絡買賣，壓力無咁大，生活比較平穩，心情都比較平靜，唔會咁易發作。」現居台灣的他更會常常到癲癇協會向小朋友分享自身經歷：「話畀佢哋聽，呢啲有啲係天生唔使驚，唔係一個嚴重嘅病。希望可以去開解佢哋，始終自己有經驗去講。」

{{hket:inline-image name="80998034_10222554382195290_7236413706370809856_n.jpg"}}{{/hket:inline-image}}

（圖片：林利facebook）

{{hket:inline-image name="116004178_10224927957013177_6058187946455226982_n.jpg"}}{{/hket:inline-image}}

（圖片：林利facebook）

相關新聞：【小虎隊的第二人生】林利戰勝大腸癌心態望回歸平淡 半百娶台妻願牽手白頭偕老

撰文：林惠珊

責任編輯：楊安莉