【新冠肺炎】陳茵媺陳豪絞盡腦汁氹細路 新手爸爸羅仲謙向模範家長取經

陳豪（Moses）同陳茵媺（Aimee）婚後三年抱三，育有兩仔一女，一家五口成日都五為一體，幸福到令人羨慕。琴日，陳茵媺喺instagram上載一家人喺帳篷內睇書嘅相，新冠肺炎疫情蔓延仲去露營？原來疫情令到Chan’s Family嘅度假大計一推再推，陳茵媺為咗唔好令３個仔女失望，決定每個星期日都會喺屋企客廳進行「露營旅行」。

{{hket:inline-image name="W.jpeg"}}{{/hket:inline-image}}

(陳茵媺instagram圖片）

陳茵媺仲特意準備露營會食嘅嘢，除咗小朋友玩得投入之外，陳茵媺自己都好開心。唔少網民大讚陳茵媺有創意又會花心思，係個好媽媽，藝人李施嬅、胡定欣都留言話想同加入佢哋嘅「露營」呀。

{{hket:inline-image name="Whats.jpeg"}}{{/hket:inline-image}}

(陳茵媺instagram圖片）

一家5口都笑到見牙唔見眼，不過就有網民留意到陳豪臉露疲態，攰到眼都擘唔大咁！其實陳豪真係忙到冇時停，除咗拍劇同經開咖啡店生意賺錢養家外，對培訓子女都係親力親為，做埋仔女嘅網球同游水教練。

{{hket:inline-image name="Whag.jpeg"}}{{/hket:inline-image}}

(陳茵媺instagram圖片）

早前陳茵媺網上載陳豪一拖三打網球嘅相，稱呼老公做「Coach Moses」，指佢帶住「三劍俠」學打波。陳豪就連接載仔女返學放學都唔會假手於人，之前３個小朋友分別入讀3間學校，上、下午班加上唔同地點，令陳豪每日載仔女出入都要花6個鐘，當時佢都直言覺得痛苦，幸好後來３個入讀同一間學校先冇咁麻煩。

{{hket:inline-image name="Wh.jpeg"}}{{/hket:inline-image}}

(陳茵媺instagram圖片）

為咗仔女，陳豪仲放棄咗佢嘅開篷跑車轉揸7人車為主，要養起3隻化骨龍嘅佢會將屬於奢侈品嘅車會排到最後位置。

{{hket:inline-image name="WhatsAp.jpeg"}}{{/hket:inline-image}}

(陳茵媺instagram圖片）

陳豪為咗多啲時間享受家庭樂，仲放棄北上賺人民幣嘅機會，上年同TVB續約8年。陳豪表示家人就係佢嘅全部，由於有感仔女大得好快，但自己又忙於拍劇少假期，所以好珍惜同小朋友相處嘅時間。

{{hket:inline-image name="Wha.jpeg"}}{{/hket:inline-image}}

(陳茵媺instagram圖片）

呢位絕世好爸爸仲獲得新手爸爸羅仲謙朋友嘅「認證」，讚佢係一盞明燈。羅仲謙笑言雖然囡囡只得3個月大，不過佢已經擔心緊囡囡嘅學業。佢避免行錯第一步，又怕行太多冤枉路，所以向陳豪取經。陳豪指為仔女安排學校嘅問題的確令家長好頭痛，見到羅仲謙難得肯開口問，佢都有分享佢嘅育兒心得。陳茵媺陳豪模範家長嘅稱號果然唔係浪得虛名！

{{hket:inline-image name="66971d8e-3fa5-4a78-9bf7-6424c76eaaaf.jpg"}}{{/hket:inline-image}}

(羅仲謙instagram圖片）

撰文：張芷晴

責任編輯：黃蘊姿