【無品乘客】古惑男上巴士「戴一戴」瞞過司機 網民憂乘客鑽漏洞新例難執行：「遮口唔遮鼻」算唔算戴咗

本港爆發第三波新冠肺炎疫情，政府宣布明日（15日）起乘坐公共交通工具必須佩戴口罩，有大埔女街坊則指法例生效前，已有古惑乘客洞悉「漏洞」，指一名男乘客過往每日搭巴士都不戴口罩，今日（14日）疑因擔心會被罰錢，上車時故意「戴一戴」瞞過司機，坐下立即除口罩睡覺，有網民亦擔心同類情況或「遮口唔遮鼻」的情況在日後亦會出現，新規例在執行上存在困難。

一位女網民今日（14日）上午在Facebook群組「大埔 TAI PO」發文，指一名男乘客每天都會乘搭早上8時15分班次、由大埔（太和）開往長沙灣的72號巴士，並於深水埗附近落車，期間卻未有佩戴口罩。事主表示，自己目前懷孕當中，因深怕受到感染，均會與該名男子保持距離，

「基本上坐車（乘客）都有戴（口罩），係得佢一個唔戴！佢唔戴都有機會將病毒四圍傳。我有咗BB，都會坐到『九丈』遠！怕咗佢，又廢是同佢嘈！但見其他人又唔出聲。嗰時未話罰錢，司機都無咩理佢。」

事主續指，鑑於政府昨日（13日）宣布立例乘坐公共交通工具必須佩戴口罩，違例者可被罰款，雖然有關新規例明日始生效，她形容該男子疑擔心會被罰錢，上車時「『扮嘢』戴一戴（口罩），過咗個司機」，在座位坐下後又把口罩除下，而後落車時為瞞過司機又再次戴上口罩，令事主大感不滿，

「落咗車又除（口罩）！咁有用咩？你『中招』全車都有機會『中』架，病毒四圍走多得你呢啲人。依家話罰（錢）先『做吓樣』戴一戴做裝飾，上車又除返瞓覺，口罩唔係裝飾品好無？」

網民看到帖文後指，「明天開始看到冇戴（口罩的人），即報警同找司機。法例坐車要戴（口罩），所以上咗車，唔可以除，途中除就要舉報犯人去」、「這情況就要大家出聲，人人有責」。

網民憂「戴口罩令」執行上存難度

不過也有網民擔心新規例在執行上或存在一定困難，「佢上咗車坐定才除口罩，誰管？」、「戴唔合格的口罩使唔使罰錢？」、「往往就是上咗車先除（口罩），司機點會睇到」、「拉低口罩講電話和露出兩個鼻孔，算有戴口罩抑或冇戴？」。

政府昨日宣布制定新規例「第599I章」，任何人登上公共交通工具，或身處公共交通工具內，包括港鐵已付費區域，都必須戴上口罩。在規例下，有關營運商、司機、警察都可要求其戴上口罩或離開，乘客如不遵從，最高可被罰款5,000元，有關新規例將在明日凌晨零時起生效。【最新防疫措施一覽】

延伸閱讀：【新冠肺炎】尖沙咀、黃大仙、深水埗多地榜上有名 確診患者出沒商場、食肆名單一覽【7月13日深夜最新】

每朝索取《晴報》：精明生活．健康家庭．開心娛樂

撰文：蘇麗儀