林作與裕美上月承認拍拖大半年，話題就未曾停過，亦由於裕美過往嘅「黑歷史」，被網民「睇死」二人最終都唔可以「走到最後」, 不過最慘係林作媽咪講到明唔畀裕美過門，事關覺得阿仔可以搵到一個「更好」嘅女仔。裕美最近都終於忍唔住為自己發聲，大爆當年同前夫林恩浩離婚前，曾遭到家暴。
裕美與前夫林恩浩（東星娛樂）
不過前夫就疑似反撃裕美「爆料」，早前喺facebook冇開名咁指某人「講大話」，不過就好快又將「地球Post」Set番做私人Post。
林恩浩Facebook截圖（裕美Facebook）
林恩浩Facebook截圖（裕美Facebook）
今日凌晨裕美在IG貼出一張截圖，顯示前夫在上月26日於FB冇開名下話指有人講大話：「沒有進步的人，是仍然把錯怪罪他人。」裕美亦不甘示弱，即時喺自己嘅社交網站出Post鬧爆前夫：「還在扮清純乖仔嗎？夠膽講自己好清白，做咩唔夠膽公開？寫完又要private左？驚人尋你仇？我告訴你！君子報仇，十年未晚！」睇嚟已經完全準備好同前夫開火！
（裕美Facebook）
裕美更毫不修飾用字，大鬧前夫係偽君子、龜縮、冇膽匪類同自私自利：「你唔洗（使）再喺度做埋d三八婆手段打去報管（館），直接（截）了當吧！直至今日還在背後講我是非！」佢續指前夫怕影響到自己工作，形象同升遷，仲話直到今日佢依然唔肯為自己所作所為負責同道歉，冇變嘅係佢。
二人當日如膠似漆，今日反目成仇。（東星娛樂）
裕美表示願意在傳媒面前單對單對質：「你對我做過嘅嘢，天知道，你亦心知肚明。」
裕美與意大利籍前度男友（網上圖片）
裕美其實曾經表示除咗畀前夫林恩浩家暴之外，亦曾經畀意大利籍前度男友家暴。不過意籍前度事後有為自己所做嘅事認錯，裕美表示已經放低咗，但前夫一直都冇向佢道歉，令佢至今仍未釋懷。
（東星娛樂）
裕美曾經講過因為佢細個嘅時候家庭破碎，令佢非常渴望組織自己家庭，亦因為咁樣唔小心投射咗「唔正確」嘅感情喺伴侶身上；又因為曾經見過日籍嘅父親好「大男人」咁向媽媽「郁手郁腳」，令佢以前家暴係可以忍耐同接受。
裕美與林作（影片截圖）
幸好裕美依家已經遇到當佢「女皇」一般嘅林作，林作三朝唔埋兩日就公開撐女友，令到唔少網民都對佢哋有所改觀，「轉呔」祝福佢哋。
撰文：黃蘊姿