【完美外傭】睇便便觀察少主健康 化身家庭教師 僱主大讚全能外傭︰數唔到有缺點

不少僱主會與外傭在家務上產生矛盾，形容遇到好外傭如同「中六合彩」。但有港媽日前（18日）指第一次聘請外傭就遇到「好姐姐」，大讚外傭悉心照顧小朋友，又有禮貌，由最初不太擅長烹飪，到現在會經常煮食物，感嘆地表示，「請姐姐真係睇運氣，我好好彩請到個醒嘅同錫我對仔女嘅姐姐」。

該名港媽在Facebook群組「外傭僱主必看新聞訊息」發帖，表示初次聘請外傭，故考慮了兩年，在細仔一歲時才決定找外傭幫忙，最後請到一位80後菲籍女傭，現已同住半年，大讚對方懂得照顧小朋友，又會自動自覺做家務，「我細仔好難自己瞓，24小時要人抱咁滯，姐姐好識湊，湊到我細仔好好；我大嗰個（大女）又好難搞，又野蠻，但姐姐都冇問題，會陪我女做功課，油下顏色」。

擔任「家庭醫生」

港媽又指，當外傭發現小朋友咳嗽或有痰時等健康問題，會主動向她報告；此外，她更會觀察排泄物狀況，如果發現大便溫度較高，或較結實，遂讓小朋友多飲水，非常體貼。

超強「家務助理」

港媽透露，外傭會每日替她們收拾床鋪，早晚拖地清潔。此外，有一次她們去完沙灘回家，外傭擔心衣物上的沙粒會弄壞洗衣機，遂手洗衣物兩次，非常細心。她續指，外傭即使在放假日子，亦會特別準備嬰兒早餐和處理好家務才外出，回家後更會陪小朋友玩耍，非常用心，難怪獲港媽大讚，

「暫時數唔到有缺點，因為姐姐好有禮貌，做乜都同我有商有量。」

化身「家庭教師」

外傭除了是家務能力，更化身成為家庭老師，港媽表示，小朋友與外傭以英文對話，由最初不懂得英文到最後能以對答如流。外傭又知道港媽希望小朋友能多，說英文，因此會特別訓練小朋友英文能力，非常用心。港媽將外傭的付出看在眼內，為此感恩，

「請姐姐真係睇運氣，我好好彩請到個醒嘅同錫我對仔女嘅姐姐！」

廚藝半年突飛猛進變「大廚」

此外，外傭在最初入屋時不善烹調，到現在經常煮美食，包括牛肉拿破崙飯、卡邦尼意粉、檸檬雞翼，甚至會在細仔睡覺時，與大女整甜品。港媽有時會擔心外傭工作量過多，有時會建議她早點休息，但都遭到拒絕，表示想陪小朋友。港媽更透露，外傭會在假期時買小禮物送給她們，「試過買衫畀我2隻小魔怪同買裙畀我」。

撰文：劉紀瑩