52歲魏駿傑與重慶嫩妻張利華結婚12年，自2015年屢傳婚變，直至今年初張利華被發現同外籍Banker交往，佢同魏駿傑早有裂痕嘅婚姻終於崩塌瓦解。
（網上圖片）
張利華日前剖白，指婚姻破裂，佢同魏駿傑都要負責任。張利華暗示同魏駿傑已經5、6年冇性生活，換句話講，即係佢26、7就已經「齋戒」。但佢亦認為自己做錯咗，唔應該未結束婚姻就開始新一段關係，張利華同外籍Banker關係曝光後，亦分開咗。
（東星娛樂）
張利華指其實2015年同單車手鄧宏業傳出緋聞前，夫妻關係已近冰點。張利華坦承自己做得最錯係拖延離婚，佢同魏駿傑夫婦關係早已名存實亡，不過就因為懼怕改變同唔捨得囡囡，亦想畀佢一個完整家庭，所以先維繫呢段千瘡百孔嘅婚姻：「近幾年我同佢都痛苦，小朋友係當中一個橋樑，連繫住我哋。」張利華指去到後期佢同魏駿傑甚至唔再嘈，開始逃避，佢會去做運動抒發壓力；魏駿傑就將全副心機放喺囡囡身上。二人溝通都只係同女兒有關，過得一日得一日。
（魏駿傑微博）
夫妻關係淡薄到冇性生活，張利華指起初有諗過係咪自己做得唔好，但魏駿傑似乎都唔係太願意溝通，最後講咗幾次之後無下文，就無再提起。張利華指魏駿傑將焦點完全放喺囡囡身上，其他人好似都變得唔重要：「作為一個女人，都希望有人愛錫，可能佢意識唔到。」但張利華表示生活上魏駿傑令佢非常豐足，佢好感激魏駿傑十幾年嚟都照顧得佢好好。即使離婚，魏駿傑都畀豐厚嘅贍養費張利華，張利華承認：「贍養費方面佢有做足。」
（魏駿傑微博）
2017年魏駿傑夫婦曾喺傳媒面前咀嘴；翌年二人去加拿大度歲於fb發放拖手照，張利華指關係一度「迴光返照」，但之後再次轉差:「其他人只係見到表面，以前每年都會去滑雪，嗰時同一班朋友過新年，影相時當然好開心。」
（東星娛樂）
當年下嫁魏駿傑時張利華只得20歲，相距二十年嘅老夫少妻，問題陸續浮現，由生活作息、心態，以至價值觀都不協調。南轅北轍嘅性格都令二人關係愈走愈遠。一個好靜，一個好動，魏駿傑已有退休心態，而張利華喜歡增值自己，不甘做家庭主婦，仍希望拼搏。
張利華活躍於社交場合。（網上圖片）
張利華坦言人漸成熟見識多咗，覺得自己學習同工作之餘，都可以兼顧家庭，但魏駿傑就希望老婆日日坐喺屋企。離婚後魏駿傑亦似乎放開咗，於fb發表心跡：「餘生，去愛一個能給你動力的人，而不是消耗你的人。」
（魏駿傑微博）
張利華為之前有報道指佢唔湊女平反，佢指魏駿傑平日返內地工作期間就由佢照顧個女起居飲食，安排所有事情，盡量做好媽媽責任，依家亦每星期同囡囡見面。佢指囡囡最初接受唔到父母分開，但經過心理輔導，依家接受咗。
張利華都好錫囡囡。（網上圖片）
離婚令到二人都「重獲自由」，52歲魏駿傑斬釘截鐵「終身不娶」，張利華就唔排除會再婚：「希望有自己事業，有自己嘅價值，同埋有人錫，有一個幸福家庭。」