無樓無車見家長遭嫌棄 港男發奮儲錢8年成功「上車」 女友父仍阻婚事：層樓太細

年輕人若要與心愛的人成家立室，除了要面對置業，還要排除萬難獲得雙方家長認同。近日一名港男表示，與女友拍拖初期曾被對方父親嫌棄「無車無樓」；8年後他發奮儲錢終於成功購入物業, 並欲向女友父母提親，未料竟然遭女友父親嫌棄單位太小，再次反對兩人的婚事。事主不禁苦惱地抱怨：「我而家真係唔知點算好，我真係唔明點解女朋友個老竇可以咁差。」

該名港男在投稿至Instagram帳戶「couple.murmur」，指9年前與女友在公司相識，當年鼓起勇氣向對方表白後相戀至今。拍拖初期時曾被女友帶去「見家長」，對方父親就甫見面就質問事主「有冇車同樓」，惟他當時並未持有任何物業，故初次見面遭反對兩人繼續交往。所幸其女友並未介意男友無車無樓，堅持與事主交往，甚至為此事與父親吵架。他指兩人真心相愛，不理解無車無樓何以成為分手理由，

「我心諗呢個世界有好多男人(包括我女朋友個老竇）都冇車同樓，咁係咪就唔可以喺埋一齊？」

被嫌屋太細反對婚事

事主不欲被女友父親看輕，於是發奮圖強，8年後終於儲夠錢，購入一間300多呎單位，並向其父母提親，怎料竟然遭對方反對，

「佢就同佢老竇講，我供緊層300幾呎嘅樓，想結婚，點知佢老竇話我層樓太細，都唔住得人，起碼要500呎。」

他聽罷立即「反白眼」，自問已經遵從對方要求「先買樓後結婚」，但仍然無法滿足對方。他因深愛女朋友，而且不想浪費彼此的青春，無法放棄這段感情。直至上個月女友意外懷孕，其父親仍然反對兩人結婚，事主為此懊惱不已：

「但係我真係好想負返責任。但係我又冇理由叫我女朋友忤逆佢老竇，同我結婚。」

此帖文引來網民熱議，不少人力撐事主「結啦，仲諗」、「有咩點算？結婚啦！」；也有人反問「你同佢老竇結婚定同佢個女呀」，著事主毋須理會對方是否贊成。有網民亦建議：「同佢講樓換樓，300轉500，再轉囉」，以作緩兵之計。亦有人提醒他，對方父親或另有主意：「小心一陣買咗500呎話搬入嚟同你住。」

撰文：黎穎芯