黃日華太太梁潔華日前病逝,終年59歲。今日黃日華偕女兒黃芷晴到紅磡世界殯儀館處理太太後事。下午黃日華駕車離開大埔寓所,抵達殯儀館後,落車向傳媒揮手打招呼,再為女兒開車門,並謂:「辛苦了!」黃日華表示喪禮日期未定:「依家上去處理,有咩會通知大家, 大家有心喇,謝謝!」華哥將座駕停喺殯儀館門前,期間其座駕因違例泊車被抄牌。
相關新聞:黃日華太太梁潔華抗白血病7年 昨午器官衰竭離世終年59歲
黃日華現身殯儀館面容憔悴。(東星娛樂)
父女堅強面對
黃日華指囡囡芷晴連日來一直都陪伴:「佢睇住我,大家要喺呢段時間互相扶持同照顧,我哋兩個都OK、堅強,大家放心!」問到太太的遺言,黃日華指太太都係最擔心阿女仲未結婚,又擔心佢媽媽(外母):「都係希望我看顧好女兒,看顧好我,照顧好佢媽媽(外母)同小動物,乖啲。我同佢講『你放心啦,阿女長大個喇,我不會照顧她,佢反過來照顧我』,仲有佢媽媽方面我哋一定會照顧。」華哥指事件唔係突然發生,都有幾年時間去適應、接受事實:「我同阿女都知道,呢日始終會來臨,我哋坦然、堅強去面對。」
(東星娛樂)
太太奮力對抗頑疾
華哥指由於疫情關係,加上照顧太太,一直都停工。佢表示暫時未有詳細打算,首先要做嘅係安排好太太嘅身後事,華哥表示太太有立遺囑,會跟佢嘅意願安排身後事。華哥又大讚太太好叻:「無論佢喺事業、照顧家人同照顧動物方面(都好叻),仲有佢好堅強,嗰種永遠唔會放棄、唔會向困難屈服(嘅精神),呢幾年無論幾辛苦,大家見到都會好心痛,但佢都冇放棄過,佢都要堅持到底,希望可以打贏呢場仗,經過一關又一關去克服,我覺得呢種精神,可以帶到畀人嘅訊息係唔好放棄生命,生命好重要。」
(東星娛樂)
帶笑安詳離世
華哥表示太太最後嘅日子並冇太辛苦:「可能在彌留期間,辛苦已過了,(一直昏迷?)都應該是,在彌留期間,器官衰竭,她走得很舒服,還有我哋同佢講嘢嘅時候,我哋感覺到佢係笑住走。」
(東星娛樂)
囡囡挑選遺照
問到芷晴可有對媽媽作出甚麼承諾,此時芷晴已落淚,只點頭示意。華哥表示佢哋經濟方面冇問題,叫大家唔使擔心。 又指女兒一直都同佢一齊住,並輕拍芷晴嘅背:「希望佢睇住我。」
(東星娛樂)
(東星娛樂)
芷晴透露已揀好媽媽嘅遺照:「媽媽病咗唔希望影相,我翻睇同媽媽嘅對話,呢四年嚟同佢嘅合照可能都只得四、五張。舊年母親節佢肯打扮同我哋出去食飯影相,我好開心。我揀咗其中一張我幫媽媽影、佢拎住一粒寫上健康嘅石頭嘅相,我希望佢帶住健康離開。」
(東星娛樂)
願與媽媽再續母女緣
提到芷晴喺社交網上表示,希望同媽媽早日相遇,返嚟做番佢嘅女,調轉角色。芷晴指呢番說話係媽媽講嘅:「媽媽話佢呢一生咁辛苦照顧我,放棄自己嘅事業,就係為咗我,佢咁辛苦,希望我可以做佢嘅角色,同佢互換。」芷晴表示媽媽過身之後冇報夢畀佢,不過就見到有飛蛾飛到佢哋屋企,好似識得聽佢哋講嘢咁。
相關新聞:【黃日華太太梁潔華病逝】黃芷晴撰長文難捨媽媽離世 「開開心心到彩虹橋玩樂吧」
芷晴(左)與媽媽梁潔華(東星娛樂)
約下午五時許,黃日華和女兒黃芷晴離開殯儀館。華哥透露太太喪禮暫定於6月13日設靈,翌日出殯。華哥表示靈堂嘅布置盡量用淡雅嘅花:「太太生前好喜歡布置家居,每一個節日嘅布置都唔一樣,鍾意靚,希望今次入禮堂嘅感覺係靚同舒服。」佢又指壽衣冇規定,着生前嘅衫就可以,依家會返屋企睇有咩衣物係佢喜歡嘅。阿女芷晴表示:「幫她揀啲首飾,幫佢揀布置,生前我都好少機會送啲大型嘅嘢畀媽媽,希望今次幫佢辦得體面。」雖正值疫情,但華哥表示會通知所有親友,依家太太手機都收到好多親友詢問有關太太喪禮詳情,想嚟見佢最後一面。
(東星娛樂)
撰文:黃蘊姿
責任編輯:楊安莉