【鞋底播毒】將軍澳街市肉檔店員腳踩砧板換價錢牌 街坊目擊大驚：完全無視衛生安全

新冠肺炎疫情下人人自危，市民的衛生意識亦有所提高。但將軍澳有街坊日前在街市發現，有肉檔店員換價錢牌時，竟直接踩上用來切肉的砧板，直斥此舉是完全無視衛生安全。家庭醫生方玉輝早前接受《晴報》訪問時曾指出，鞋底每日都會接觸街上的細菌，如接觸鞋底恐會增加細菌傳播機會。

「眼不見為乾淨，見到無理由唔出聲。」該名街坊昨日（25日）於Facebook群組「將軍澳主場」發帖，指昨日下午經過寶盈香港街市一個肉檔時，目擊令人震驚的一幕，

「睇到個店員換價錢牌時，直接踩上砧板上，完全無視衛生安全。我見到即刻同佢講，佢話會消毒，我再問點消毒，佢支支吾吾。大家小心。」

{{hket:inline-image name="market260520204.jpg"}}{{/hket:inline-image}}

店員直接用腳踩上砧板，鞋邊放有數塊豬肉。（「將軍澳主場」圖片）

此事引來其他網民熱議，不少人均認為店員所為極不衛生，「救命！ 以後都唔敢去買」、「唔講得笑，鞋底幾多細菌幾污糟，踩上張豬肉枱度隔離仲有一大舊(嚿)豬肉你夠膽你就去買啦」、「砧板好像鑲緊在木枱，好難用水清洗，通常用刀刮去表面木碎，再用濕布抹抹算，要保養還要加層油，所以很不衛生」。

同時，亦有網民表示：「其實好多地方啲豬肉未斬開掛上鈎前，都係一隻隻喺地下拖行，只不過唔係好多人見過，所以最緊要買到返屋企建議用洗浸方式清洗乾淨。」

研究：鞋底菌量比馬桶座板高3倍

美國休士頓大學（University of Houston）早前一項研究指出，鞋底藏有大量致病細菌，「困難梭狀芽孢桿菌」（Clostridium difficile）比馬桶座板的菌量高3倍，可引起腹瀉問題。

家庭醫生方玉輝早前接受《晴報》訪問時亦稱，鞋底每日都會接觸街上的細菌，如接觸鞋底會增加細菌傳播機會，故提醒每日回家應先除鞋，再將全對鞋噴70%消毒火酒消毒；或用1:99漂白水浸地布，然後把鞋放在地布上殺菌。

責任編輯：李凱晴