【壞榜樣】港媽搭的士不戴口罩 被好心提醒反單打報復 司機一句至理名言完美KO

父母言行舉止若有不當，隨時為子女立下壞榜樣！有的士司機指日前一名港媽與兩名孩子及外傭上車後便除下口罩，他好意出聲提醒，未料此舉反惹來對方惡意「單打」報復兼責罵，又聲稱要投訴他是「黑的」。不過，他不但未有因而怨懟對方，反而說出一句至理名言，被一眾網民大讚EQ高。

「司機溫馨提示乘客戴番口罩是原罪？」該名的士司機上周五（22日）在 Facebook群組「的士司機資訊網 Taxi」發帖，指一名年輕港媽「一拖二加工人」上車，

「（港媽）上車後就除低嗰罩滔滔不絕咁講嘢。只係客氣地溫馨提示一聲：唔該戴番嗰口罩，換嚟到達後媽咪玩『單打』唔高興。」

他指出，由於當日大多數客人都以100元紙幣付款，因此他手上共值500至600元的20元面額紙幣已經耗盡。未料到達目的地後，該名港媽也是以100元紙幣付款，於是他便詢問對方有沒有「散紙」，又或者可以八達通付款，

「佢即時話司機唔係要有100蚊找贖嘅咩？我客氣同佢講苦衷，如果你唔高興嘅，我惟有找大餅畀你，咁佢又拎到3張廿蚊紙出嚟喎（咁神奇嘅？）照找足$5.4畀佢。」

未料，找完錢後港媽未肯落車，反而留在車內斥責司機，「話頭先我好叫佢戴番嗰罩（哦！原來係呢個原因）又話佢唔戴罩關我乜事？（而家你坐我車喎？）話要去投訴我係黑的喎！咁我咪打埋收條畀佢去投訴囉！（費事你唔記得我車牌）佢仲猛咁鬧我，仲叫我好收聲（咦？乜我係你私人司機嘅咩？）」

對於港媽的無理指摘，司機未有惡言相向，反而是背住對方回敬一句：

「言教不如身教！」

對此，不少網民大讚司機「講得好」，又認為港媽的言行舉止為子女立下壞榜樣，「師兄做得好呀！」、「好EQ！」、「畀我會打返兩個乞嗤、咳嗽......睇吓佢咩反應！」、「呢啲人嘅仔女一定忤逆、冇家教，放心」。

責任編輯：李凱晴