紅遍大江南北嘅陳偉霆(William),大陸萬千少女都被佢迷倒。前一排由於新冠肺炎疫情緊張嘅關係,William喺香港休息咗一排,不過近日佢又再開始投入拍攝新劇《斛珠夫人》。之前William嘅古裝造型曝光,已經令一眾粉絲為之瘋狂,尋日佢又上載疑似係佢劇中古裝造型嘅自拍照,再配上「想要帶你回家」嘅Caption,趁住520(普通話諧音我愛你)冧粉絲。
(陳偉霆微博)
相中William梳古裝髮型,兩鬢髮絲飄逸,手抱玫瑰半遮臉,再配合迷人嘅眼神,即刻引嚟微博過萬嘅粉絲留言示愛:「飽飽520我愛你。」、「飽飽快帶我回家。」等等。
相信香港嘅朋友都好好奇點解William會叫飽飽,其實大陸嘅粉絲對佢仲有好多嘅愛稱,今日就一次過介紹晒畀大家知啦!
飽飽
「飽飽」呢個愛稱原來粉絲已經叫咗幾年。陳偉霆曾經被問到知唔知自己點解會叫呢個名:「我其實不太清楚為甚麼會有這個名字,但是我覺得是寶貝的意思。或者是因為我經常吃得很飽,或者是他們覺得我很胖,就叫「飽飽」。」都有人指係因為有一次陳偉霆喺活動上講咗一句「嚇死寶寶」,所以飽飽(普通話諧音)、飽貝呢啲名就不脛而走。
(陳偉霆微博)
等等
William嘅中文名陳偉霆,英文全名Chan Wai Ting 。佢嘅名WaiTing黐埋一齊就變成咗英文字等待(Waiting),因此得來等等呢個咁可愛嘅名。
(陳偉霆微博)
聚聚
據知係William同專屬粉絲之間嘅愛稱,每當William現身,粉絲們都會聚埋一齊,所以就叫佢「聚聚」。另一個講法就係大陸會將「大大」作為敬語,大大又衍生出「巨巨」,而巨巨又同「聚聚」普通話讀音一樣。
兔兔
William英文全名Chan Wai Ting同寵物兔普通話拼音chǒng wù tù都一樣3個字係CWT開頭,再加上佢笑起嚟有兔仔牙,所以就有「兔兔」之稱。
(陳偉霆微博)
大師兄、佛爺
呢兩個名都係因為佢曾經參演嘅劇集角色得來,「大師兄」係來自《古劍奇譚》中扮演大師兄陵越;而佛爺就係源於劇集《老九門》。
大師兄(網上圖片)
佛爺(網上圖片)
人氣爆燈嘅William日前再為名表拍攝廣告短片,慶祝該表款推出20周年。William喺短片中以「20」為單位,再次表達佢對「時間」嘅觀念:「因為我太貪心了,我想做的事情太多了,20年我覺得不夠滿足我的所有欲望。」
相關新聞:陳偉霆曬港式英文老尷到睇唔晒 蕭叔叔正確示範聽到耳朵高潮
(陳偉霆微博)
片段中見William左手食指嘅「W」紋身消失咗,原來係用化妝遮住,相信係唔想搶去佢手腕上名表嘅Focus!
(微博圖片)
撰文:黃蘊姿