【女士注意】太和可疑男疑巴士上扮瞓博懵 女街坊：鎖定3位女生每日專坐隔離

女士們獨自乘坐交通工具時，定要小心留意周圍環境保護自己。一名大埔女街坊指近日發現一名每日乘搭272E線可疑「巴士男」，聲稱自己曾遭其坐在身旁裝睡「博懵」，當時曾就此向車長投訴，其後再多次遇到對方，指他現已改為「鎖定」其中3名經常搭同班車的女乘客，呼籲女士要多加注意保護自己。

一名大埔女街坊前日（15日）在Facebook群組「大埔 Tai Po」發文，表示自己曾在巴士上遭一名男乘客「博懵」。她指自己近來才轉搭272E號巴士上班，發現該名涉事男子幾乎每天都會乘搭早上7時40分、開往深水埗的272E線巴士，於太和總站上車、長沙灣廣場對面落車，形容他每日在車上搜尋「獵物」，

「佢係𥄫（盯）住每個上車的女乘客！一上到車，佢先會坐下層，去到文娛中心個站，佢就會走上上層，坐喺佢鎖定嘅『獵物』旁！」

事主認為自己也曾被涉事男子「盯上」，形容有一次該男子坐在其身旁，因當時「前後都無人坐的」，故當下已感到非常奇怪，在她自顧聽歌期間，突然發現「唔對路」，該名男子「愈坐愈埋」，事主雖稍為郁動示意不滿，但對方毫無反應，後來更「扮瞓」意圖「博懵」，

「（涉事男子）個頭攝咗係2張櫈位中間！我望吓佢，佢係無瞓的！」

事主指自己曾向車長投訴，車長喻她報警處理，惟因當時趕時間上班，且不欲對其他乘客造成阻礙，最後便決定「放生」該名涉事男子。事主續稱，涉事男子在該次後，未有再坐到其身旁，卻把目標轉移到其他女士，事主形容，

「佢（涉事男子）依家已鎖定咗車上每日的3個『獵物』，輪住坐喺嗰3個女仔隔離！都係做埋同一個動作，扮瞓『博懵』！我都見有人已經開始留意到佢！」

事主遂在文末提醒，請女士們多加小心該名男子，表示自己也是「其中一個受害者」，「希望各位姐妹廣傳！同埋學識保護自己！」

不少網民看到帖文後，均認為事主當初應挺身而出舉報，留言表示「講真樓主當時真係要挺身而出，遲到呢啲好小事，唔係嘅話佢會愈嚟愈大膽」、「真係唔使怕！你當時講出聲一定大把人幫你」、「樓主和各位小姐遇着呢個情況一定要報警，有冇用都好起碼有個阻嚇性，千祈唔好覺得阻住成車人，因為呢啲人真係唔可以放過」。另有一位女網民聲稱多年前曾遇到疑似該名男子，對方疑做出不雅動作，使其印象甚深，至今仍有陰影。

撰文：蘇麗儀