盤點疫市下另類招聘職位 動森/睇戲/曼迷專員/寫postcard都搵到錢

疫情由今年年頭持續至今，搞到唔少打工仔失業。不過，而家唔一定要喺公司坐定定先賺到錢，有本地以至海外企業疫市招聘另類職位，以住俾人覺得不務正業，成日喺屋企打機丶煲劇同上網嘅宅男宅女，而家開始都可以理直氣壯話比人知，呢啲技能都可以搵到份工做！

專責玩動森 仲送Switch主機

香港電子競技聯盟（CGA）近日招聘打機專員，職責範圍只需要專責打機及玩《集合啦！動物森友會》，一個月內完成設計及建設特定島嶼，月薪1.3萬港元起。而獲聘者仲會獲提供Switch主機一部，與其他CGA小編一起玩遊戲。根據CGA官方公布的資料顯示，填表並提交《動物森友會》作品一份，可立即上班者優先。如果請咗，表現良好者將考慮續約或轉為全職聘用。

請「麻瓜」同「魔法師」 Home Office睇戲

《哈利波特》戲迷有福啦！美國有網站現正招募5名「麻瓜」及「魔法師」，唔駛去霍格華茲，只需要乖乖喺屋企睇哂全套《哈利波特》系列及前傳電影，就有1000美元（約7750港元）人工，仲會提供《哈利波特》馬拉松生存裝備，包括牛油啤酒焦糖爆谷及容杯、怪味糖及奇怪青蛙朱古力零食包、霍格華茲不銹鋼保溫杯、美國外賣訂餐平台GrubHub禮品券等。

申請人須年滿18歲，可於美國合法工作，就可以5月15日前上EDsmart.com網站申請，合格候選人將由「分院帽」挑選做「麻瓜」定「魔法師」。

年薪近百萬港元 請曼聯迷玩Twitter、IG

曼聯是次招聘社交媒體部門主管，表明申請人必須係曼聯球隊超級球迷，要肩負起建立聯繫同形象管理嘅重任，主力喺社交媒體包括Twitter、IG上，以有趣、創新方式同球迷互動，亦要定期同球員溝通，去研究社交媒體的內容和策略。不過，社交媒體部門主管只可以管理曼聯的社交媒體貼文，無權控制球員的個人社交媒體，而且年薪為10萬鎊（約97萬港元），除開月薪有8萬港元。份工荀唔荀就見仁見智，但經常有機會同球員接觸，相信應該唔少曼迷衝去申請。

寫明信片 賺時薪過百港元

美國一間社企Outrage推出一個寫明信片工作計劃，幫助失業者渡過疫情困難時期，賺取最低工資每小時15美元（約116港元）。申請人需要有合法於美國工作的資格，可選擇一星期工作最多40小時，工作內容主要寫多款含祝福意義的明信片及信件，以供大眾購買。

============

接收全方位穩健財富管理資訊，請讚好「健康財富 Wealthy Life」Facebook：https://fb.com/Wealthylifehk/