【婆媳糾紛】老爺奶奶衛生差入屋不洗手 廣邀親友上門聚餐 港媽壓力爆煲：想帶女離開

新冠肺炎在全球大爆發，市民衛生意識普遍提高，而家長更是大為緊張。然而，一名與夫家同住的港媽卻大受困擾，指老爺、奶奶衛生意識差，不但外出回家後不洗手，在「限聚令」下更邀請親朋上門聚餐吃火鍋。港媽坦言壓力「爆煲」，「好想帶個女離開呢度！」

「就嚟要爆了……」該名港媽日前在網上討論區「親子王國」發帖，指自己在疫情下，因為老爺、奶奶衛生意識低而產生極大壓力，

「口口聲聲話屋企有個孫，要注重衛生……返到屋企唔洗手、唔即刻沖涼，搞到我好緊張佢接觸我個女之前有冇洗手……有冇抺電話之類嘅清潔……」

她續指，早前兩老更廣邀親友上門吃火鍋，

「總共9個人圍埋互噴口水！（我就係見人多所以帶個女去外家食飯）今日好聲好氣同奶奶講聲：如果下次都咁多人食飯可以早啲話聲我知嗎？竟然換來一句：你唔鍾意咁多人呀？」

於是，她向奶奶解釋，在疫情下如此多人一起吃飯，眾人不戴口罩之餘，「仲要圍埋一齊咁口水噴嚟噴去，好似唔係咁好」。其後，她打了一篇「千字文」傳訊予老爺，對方才感到事態嚴重，「但係都只喺我面前交功課……日日都提心吊膽」；至於奶奶，其夫在她逼迫下才向奶奶反映此事，

「唉……我都唔知佢點同佢阿媽講，但係見我奶奶今朝啲態度就知佢仲嬲緊……」

對此，她認為兩老的思維難以改變，令她感到無助，「好聲好氣講又聽唔入耳……講得嚴重又話我擔心太多……我真係好想搵人幫下我……惟有自己做多少少，始終地方唔係自己……用自己最大嘅能力去保護個小朋友囉。就算大吉利是起上嚟，怪都怪得理直氣壯啲嘛！」

有網民感同身受：奶奶每周邀請親友上門食飯

有網民建議她搬走，「一齊住都係好慘……有能力的話最好搬開喇……」但港媽無奈地稱：「努力中！無奈現階段都要一齊住，所以上嚟發洩下，唔係真係會人都癲！」

此外，亦有同為人母的網民感同身受，更指奶奶每星期都邀請親友上門食飯，「食完仲要坐幾個鐘，又唔洗手，佢哋個個係去完街過嚟，然後周圍坐，啲嘢全部要去消毒。重點係又冇得出聲叫佢地唔好過黎（因為間屋係奶奶）。」

撰文：李凱晴