疫情影響下樓市近日表現反覆，一方面各區減價盤紛現，另一方面亦有買家爭執平貨。當市場出現筍盤，甚至有買家願意俾「開門費」睇樓。據市場消息指，近日荃灣荃威花園一個連租約單位，準買家每次上門睇樓要向租客支付500元「開門費」，最終單位以455萬易手，創屋苑今年最低價。
睇樓要先俾「開門費」，值唔值得就見人見智，但肯定有「篩選」作用，因為有租客在，如果太多人睇樓會很麻煩，而且很多買家可能並非實客。另外單位若有租客居住，其實連業主也無權入門，若要求租客開門，可能造成對方的麻煩，所以唔收錢是人情，收錢才是道理。
「開門費」或反映業主急住放
要收「開門費」睇樓，代表業主等不到租客完約就要賣，某程度上反映業主急住放，通常叫價會比市場低一截，或者只求認真洽購的買家，之後價錢有得傾。好像上述荃威花園E座低層2室單位，實用面積436平方呎，2房間隔，過去兩星期至少有2組客到單位參觀，以該單位月租約11,000至11,500元計，租客這個月大約可節省1成租金。最終該單位以455萬易手，是屋苑今年最低成交價，難怪要收「睇樓費」也有市場。
▲荃灣荃威花園E座低層2室單位收「睇樓費」也有市場。
這種「開門費」盤始終屬於極少數，市場上更多是「無樓睇」的租客盤。如果業主可提供單位相片，又或屬於知名屋苑，多數都有買家願意承接，例如3月初就有一宗「無樓睇」成交，火炭穗禾苑G座高層一個472實呎單位，原則2房改成1房間隔，單位望城門河景。單位因有租客居住，外區新婚夫婦買家在沒有睇樓下，只睇相片便決定入市。單位原叫價528萬，累減53萬以475萬獲承接，呎價10,064元。
對上2月中亦有一宗「無睇樓」成交，單位為美孚新邨1期百老匯街23號高層J室，向東望樓景，3房間隔，實用面積約464平方呎，建築面積約640平方呎。單位原叫價680萬元，放盤數個月後減價63萬元，以約617萬元售出，實用呎價約13,297元，建築呎價約9,641元。據了解，新買家認為單位價錢相宜，即使「無睇樓」仍拍板入市。
▲火炭穗禾苑G座高層一個單位，在「無樓睇」下成交。
「無樓睇」揀樓貼士：
其實只要做足功課，「無樓睇」盤未必一定買唔過，以下提供6大「無樓睇」置業貼士：
1）做足功課：買家可查閱物業的平面圖，了解單位原則結構及主力牆的位置，並向物業代理查閱該單位有沒有作出改動。
2）知己知彼：如果屋苑有相同隔間的單位放盤，買家可與代理約睇，以此了解單位基本質素及進行度呎。
3）事前查冊：因為看不到實際裝修，可通過查冊去了解物業有沒有僭建，以及其他業權相關的問題。
4）代理代問：部份屋內問題如漏水、電器損壞等，「無樓睇」時難以察覺，買家可委託物業代理代為查詢。
5）未雨綢繆：即使有相睇也有可能是舊相，買家始終要有心理及財務準備，要預留部份資金作修補之用。
6）專吼平盤：有兩類買家「反其道而行」，不介意「無樓睇」甚至當成好處。第一類是投資客，已有租客住代表不用再搵新租客，買樓前只要做足功課就可以。第二類是早已打算全屋裝修的買家，單位內籠質素如何其實不太重要，而且「無樓睇」單位較少客會睇，競爭少較具議價空間，二來業主開價一般較低，買家可抵銷一部分裝修費。
編輯：唐婉琦
接收全方位穩健財富管理資訊，請讚好「健康財富 Wealthy Life」Facebook：https://fb.com/Wealthylifehk/