【無碼公開空服員名單】莊思明經濟艙感被忽視「搵經理」投訴 華生網民不齒拆解機艙結構反駁

莊思明日前獲邀到泰國出席一個宴會，朋友包佢交通同酒店，並安排佢乘搭某航空公司嘅經濟客位，但佢就表示喺旅程中遇到不愉快嘅事！尋日（8日）佢喺社交網上載千字文吐苦水，引嚟網民熱烈討論。

{{hket:inline-image name="Lisa20200109_0002_1024.jpg"}}{{/hket:inline-image}}

（莊思明微博）

莊思明話自己想借筆填入境表，但就畀空中服務員忽視：

「我今朝座位係43D，我喺航班中途㩒（撳）咗個叫空中服務員嘅燈，因為我想借支筆填入境表。我㩒（撳）咗一次好耐都冇人嚟，於是我就睇睇我座位上嘅燈，咦，點解熄咗但又冇人問我有咩需要嘅？唔緊要，我再㩒（撳）過，點知又係俾（畀）人熄咗。之後我㩒（撳）第3次，今次我就刻意向後睥睇吓會唔會睇到究竟發生咩事，終於俾（畀）我睇到啦，原來有個空姐喺我後面熄咗我盞燈然後就擰轉面行開咗！佢係完全冇問過我有咩需要就行開咗，我想叫都叫唔住佢！」

{{hket:inline-image name="11.JPG"}}{{/hket:inline-image}}

（莊思明微博）

莊思明話佢撳第4次服務燈，先終於有一位女服務員回應：「我覺得有需要同機上嘅高級空中服務員表達，因為我唔希望呢種不快嘅事情會發生喺其他人身上。」之後有位男空中服務員向她道歉：「過咗幾分鐘左右個男空中服務員過嚟搵我，佢同我講佢已經同經理講咗件事同埋已經發現咗係邊個，佢問我想點處理。」

{{hket:inline-image name="a443a725-42b8-4e2c-bc61-b90dd0eb2aa6.jpg"}}{{/hket:inline-image}}

莊思明之後已經刪除咗相關IG Story。（莊思明IG）

雖然莊思明話講件事出嚟，係希望該公司可以積極處理類似問題，唔少網民都支持佢投訴，話今時今日咁嘅服務態度唔得。不過都有人認為佢小事化大同覺得事件有疑點，加上佢即場投訴完再放上網公審，仲上載該班航空嘅機艙服務員名單，有洩露他人私隱之嫌，引起部分網民不滿。

{{hket:inline-image name="b50dddfb9086c4b01141c6be293837cd.jpg"}}{{/hket:inline-image}}

（東星娛樂）

一位網民仲即刻「華生」上身，唔知佢係咪都係該航空公司嘅員工，似乎非常熟悉機艙結構，逐一提出莊思明指控中嘅唔合理之處：

• 「你坐左邊43D，畀個Information（資訊）你，要撳熄你個Call light（傳呼燈），有3種方法：一係左邊第1道門嘅Panel（控制台）；二係右邊第4道門機尾有個Panel；三行去你個位，你頭頂個燈可以撳熄佢。莊小姐你喺左邊第3道門前面，如何可以擰轉向後望到18行之後喺右邊嘅Panel、有Crew（工作人員）撳熄你個燈？係嘅話你都幾叻，對眼講緊望到18行位打後再轉埋個彎隔咗道牆嘅嘢，咁你都勁過Avengers喎啲超能力。

 

• 假設有位同事，3次都真係撳熄咗你個燈，咁你係咪又需要搵內部同事拎Crew list（空服員名單）出嚟？你回應話問過律師唔構成私隱問題，咁係咪我哋又可以公開啲客嘅名，同佢哋飛咗去邊嘅Schedule、食咩餐、投訴過啲咩？如果代入個身分，有一日有空姐飛完你班機，放你個Passenger profile（乘客檔案）上嚟，你又有咩感覺呢？既然你喺下面都回應咗你覺得自己太衝動，公開咗資料令人感到唔舒服，我希望你有膽Post story公開Set crew嘅名，都有勇氣公開出Post向受影響嘅空中服務員同其他人道歉。」

 

莊思明都好有心機咁幾乎逐個回應，堅持錯不在佢。雖然佢承認公開空服員名單係佢嘅魯莽，但就話自己係想表揚處理事件得當嘅空服員。事件到咗今日仍然繼續發酵，莊思明嘅社交網繼續被洗版。

{{hket:inline-image name="678fe229gy1g6rcagfu0pj229s1pchdt.jpg"}}{{/hket:inline-image}}

（莊思明微博）

講起服務態度，亦有網民翻莊思明舊帳。早前莊思明男友楊明投資嘅食店被食客投訴店內燉湯鮑魚太細隻，莊思明立即護航反撃：「謝謝反映，我得閒幫你去海味舖Compare（比較）吓價錢呀，睇睇$88咁多餸係咪太貴！會改良的，謝謝你的意見！」甚有老闆娘氣勢呀！

{{hket:inline-image name="81917986_10156602223591561_1822295761166008320_n.jpg"}}{{/hket:inline-image}}

（莊思明Facebook）

撰文：黃蘊姿