現年12歲,有「香港小巨肺」之稱嘅譚芷昀(Celine)小妹妹,3年前參加美國才藝表演節目《全美一叮》(America's Got Talent)時,表現一鳴驚人,贏得全球關注。雖然她最後未能躋身決賽,但工作已排到密密麻麻。
(《全美一叮》截圖)
人怕出名豬怕肥,當年Celine妹妹爆紅後,其父譚順生被曾同佢有生意合作嘅家燕姐批「搶學生兼冇道義」,又被爆出博士學歷成疑等問題,令Celine妹妹喺香港較少曝光。不過咁都冇影響Celine妹妹繼續吸金,年紀輕輕已帶挈全家由北角舊樓搬去山頂千呎豪宅,自己亦入讀出名費用昂貴嘅山頂國際學校。
(Celine Facebook)
3年過去,女大十八變,Celine由可愛小妹妹開始蛻變為少女,愈大愈靚女之餘,演出仲愈來愈穩定,自然成為出騷「搶手貨」!
(Celine Facebook)
(Celine Facebook)
(Celine Facebook)
Celine Keep住密密做,約半年前就參與咗內地節目《巔峰之夜》,唱自己創作嘅歌曲《Who I am》,獲評判大讚「天賦過人」。雖然最後被淘汰,但「人仔」已經「袋袋平安」。
(《巔峰之夜》截圖)
早前Celine仲賺埋坡紙,有報道指聖誕節前,佢同埋屋企人去新加坡參加《亞洲影藝創意大獎》,擔任表演嘉賓獻唱《How far I'll go》,騷價達20萬,大會更安排五星級酒店招待佢哋一家4口,留喺當地豪玩豪食幾日嘆世界。有人擔心Celine妹妹細細個已經周圍飛會影響學業,爸爸譚順生就話Celine好鍾意讀書,成績都唔錯。細細個就事業同學業都兼顧到,好成熟呀。
(《亞洲影藝創意大獎》截圖)
(《亞洲影藝創意大獎》截圖)
撰文:黃蘊姿