【怪獸家長】詐病睇醫生遭媽媽喝斥嘥錢 女童吐心酸原因母不為所動

「每日暫停十分鐘，聽聽少年心底夢」，相信這句宣傳片口號不少家長都耳熟能詳，一名診所護士日前卻遇上一對母女，其中母親看似不情願地帶女兒前來看病，過程中女兒都十分沉默，只說自己「唔舒服」而已。最後，女兒坦承自己詐病，並說出希望媽媽陪她的心聲，換來的卻是其母一句：「你搞到我白白要畀錢！」

母不情願地帶女看病 「唉，又冇幾百蚊」

診所護士「珍寶豬」在其Facebook專頁「診所低能奇觀」發文分享，指某日一對母女登記後坐下等看醫生時，母親詢問道：「做咩無啦啦病㗎？」見女兒沒回應，母親再表示：「你係咪真係好唔舒服呀？尋日都冇事㗎，又會突然咁嘅？」女兒繼續保持沉默，母親嘆氣表示：

「唉，又冇幾百蚊，今個月你老竇都唔知搞唔搞得掂！」

「珍寶豬」表示，母親說完後未有出聲，繼續低頭看電話。到入房見醫生時，女兒面對所有提問仍十分沉默，只說出「唔舒服」3個字，醫生只好為她開藥了事。至等候取藥時，女兒突然詢問：

「如果我冇唔舒服嘅話，你係咪就去返工啦？」

女兒坦承扮病 吐心聲想媽媽陪伴

母親聽後，邊望電話邊稱：「梗係啦，要搵食㗎嘛，唔係點養你呀？今日咁樣又冇幾百啦！」女兒再度詢問，如果她不吃藥的話，母親可否不要上班。就在母親堅持要她食藥「嗱嗱聲清咗啲菌」時，女兒終忍不住說出真話，坦承自己沒有不適。

母親聽後放低手上電話，生氣地問：「你冇唔舒服？咁你又叫婆婆打電話畀我叫我同你嚟睇醫生？我返緊工都要走返嚟同你睇醫生呀？」對此，女兒心酸地解釋：

「我同學話佢唔舒服，佢媽咪陪咗佢一日……」

母得知真相後極生氣 網民籲多陪伴「且行且珍惜」

女兒的解釋令母親更加生氣，她甚至向「珍寶豬」要求取消剛才的「交易」，稱「你寫返張假紙畀我交返學校就得啦」，「珍寶豬」只好無奈地稱：「如果你唔要藥嘅話都仲可以嘅，因為佢都睇咗醫生，冇得就咁取消㗎啦，而且你仲要病假紙……」最終，母親怒斥女兒「你睇吓你，你搞到我白白要畀錢啦吓」後，兩人便無言以對。

對此，不少網民紛留言表示心酸，「成長永遠比賺錢重要」、「希望小女孩能夠有一天快樂起來」、「如果連返少一日工陪個女（不論理由）都會令到家計困難，咁唔該唔好生，真心」、「生仔要考牌真係要實行」。另有網民稱：「對子女嘅陪伴真係唔可以少，一眨眼佢哋就長大㗎喇，到時掉返轉係做父母嘅想佢哋陪伴多啲都唔理你！到之後後悔，都已經錯過晒佢哋嘅成長，且行且珍惜！」

專家：父母應抽空親身陪伴子女

中大香港亞太研究所「青年研究中心」教授李賴俊卿早前曾指出，據中大一項調查發現，每3名子女便有約1人認為父親難以溝通；每4人有1人感到難與母親溝通，故希望父母細心聆聽，抽空親身陪伴子女。她又稱，以往有情緒較差的學生會透過進食零食應付壓力，日後或因而出現飲食失調問題。

撰文：李凱晴