95年當選亞洲小姐亞軍、現年42歲嘅黎淑賢（Bonnie）生咗四個小朋友都睇唔到歲月嘅痕跡，但原來佢都曾經因為生仔令肚皮又鬆又皺而覺得非常困擾。
（《古惑仔3之隻手遮天》截圖）
（黎淑賢IG）
貴為凍齡熟女嘅佢，外間一直以為佢食極唔肥、生極都瘦，但其實有苦自己知。黎淑賢十月懷胎先後生咗四個仔，即係重複將肚皮脹大再收縮四次，令到肚皮又鬆又皺，肚紋出晒嚟，冇晒自信。佢話產後曾經有一次以三點式示人，但就被一位童言無忌的小朋友話：「個肚咁肉酸！」令到佢心情低落，仲差啲患抑鬱！
（黎淑賢IG）
但黎淑賢冇因為咁而「自暴自棄」，仲想認真修身重拾自信再着一次三點式，拍攝一輯性感寫真留念。老公支持之餘更提議由老婆擔任佢醫學美容店嘅代言人。於是黎淑賢半年內日日去老公舖頭度做機，終於令肚皮回復緊緻，甚至仲弗過做女嗰陣！
（黎淑賢IG）
黎淑賢同做美容醫生嘅現任老公許智政2007年奉子結婚，之後2012年再生細仔，佢同老公經常一齊出席各類大小場合，非常恩愛！愛美係人嘅天性，黎淑賢近水樓台，都不諱言有打針保養。不過佢就話扮靚唔係為咗取悅人，至緊要係自己覺得好睇，唔需要為別人而生活。
（黎淑賢IG）
黎淑賢1999年曾與盧惠光結婚，二人育有兩子，但婚姻只維持8年。Bonnie坦言以前廿幾歲就結婚，唔夠成熟：「依家我有4個仔，從佢哋身上，我可以學到好多。」離婚後盧惠光獲撫養權，獨力照顧現年20歲嘅盧俊諺（Jacky）同13歲嘅盧俊希（Jovan），不過兩子同黎淑賢感情要好，經常見面食飯，甚至同兩個同母異父嘅細佬齊齊去旅行。
盧惠光兩個仔都好生性！（盧惠光微博）
黎淑賢大仔Jacky已經20歲，三年前去到英國留學修讀物理治療，憑佢高大靚仔嘅優勢獲電影老闆睇中參與演出泰國校園電影《The One You Love》。不過黎淑賢就唔多鼓勵阿仔依家呢個年紀入行，希望佢學業為重。但佢就認為阿仔都20歲，阿媽都左右唔到佢去向，都係睇番阿仔自己嘅興趣。
（黎淑賢IG）
邊似有咁大個仔！（黎淑賢IG）
Jacky早前更加帶埋女朋友同嚟黎淑賢慶祝生日，黎淑賢大讚阿仔女友好純好有禮貌，仲話幾鍾意佢添！
男朋友個阿媽咁靚，都好大壓力！（網上圖片）
撰文: 黃蘊姿