【晚吹】美甲師爆老闆逼員工做含膿灰甲 重用一盤洗腳水浸足一日

最新一集《晚吹- 又要威又要戴頭盔》，搵嚟4位由學徒做起嘅美甲師做嘉賓，佢哋喺節目中大爆美甲界背後嘅陰暗面、奇聞同辛酸史，除咗慘情之外，仲非常嘔心，真係食飽啲都唔好睇。

{{hket:inline-image name="JP0u6Lk5-8WySxFuyfF9yEgSPlvDbySFWBvYDlgb2A4.jpg"}}{{/hket:inline-image}}

(VIU TV電視截圖)

入職捱低薪

4名美甲師話美甲店同髮型屋嘅制度相似，學徒要由低做起，唔只人工低，連工作性質都好「下欄」，所有打雜工作都係新嚟新豬肉，學徒連廁所都要洗！其中一位美甲師指自己初入行時月薪只有4千蚊但每日就做足９個鐘。另一位美甲師就話佢識一位行家入行嘅時候，畀老闆要求佢畀8千蚊，做滿一年先退番畀佢，但到做滿一年之後又諸多藉口唔退還８千蚊，就咁白白冇咗2個月人工！

做戲咁做

美甲過程時間長，一般都會同客人傾偈，隨時仲要做埋心理輔導！有美甲師話佢曾經試過有「大婆」、「老公」同「小三」都係佢客人，「小三」仲喊住咁同佢「告解」，真係好似做戲一樣。另外有位美甲師話曾經有一位藝人去做完美甲之後話冇錢喺身，要去撳，但之後竟然一去冇回頭。不過佢就冇開名，主持迪偉就叫美甲師咪後同佢講係邊個，話幫佢追番數咁話！

為錢可以去到幾盡

一位嘉賓講起曾經有客人有灰甲問題嚟做美甲，仲要含膿發臭，但老闆竟然扮睇唔到話只係「有少少瘀血」，要美甲師照幫佢做，美甲師硬住頭皮做，只可以做完之後起勢消毒。又有老闆唔畀美甲師為客人修腳甲嘅時候戴口罩，搞到腳甲彈到美甲師個口，真係諗起都反反哋胃！

相關新聞：修甲後指頭腐爛發黑 婦人手指爆膿開刀切腐肉【附醫生意見】

「環保」美甲公司

不過最恐怖嘅都係衛生問題：「以前間公司有得做手蠟treatment，每次啲客浸完，(職員)都會叫我將蠟交俾佢哋處理，一開始我以為係要做垃圾分類，一直到有次，我見佢哋將啲蠟倒返落機再用……」手蠟重用都未算嘔心，另一位嘉賓話見過連浸腳水都要用足一日：「因為間舖無去水位，變相每次都要去商場洗手間拎水，客人太多嗰陣未必會得閒去拎水，老闆於是就叫員工加啲浴鹽落啲水，全日嘅客就係用嗰一桶水，每次係咁易加少少熱水落去，搞到好似係新水咁。雖然話會加消毒藥水，但我唔覺得有落。」

相關新聞：女士美甲割傷染食肉菌 手指手臂腫脹險截肢

{{hket:inline-image name="2.JPG"}}{{/hket:inline-image}}

(VIU TV電視截圖)

撰文: 黃蘊姿