【險過剃頭】薛家燕曾被保鏢串謀綁架 危急關頭邊個出現救番一命？

尋晚播出嘅《娛樂大家》請嚟薛家燕做嘉賓，雖然家燕姐玩其他遊戲嘅時候表演糊里糊塗，唔太識玩咁，但就好有效果，同其他後生一輩一齊玩嘅時候爆出唔少笑料。

{{hket:inline-image name="596d5e05-a42f-468e-8a89-02bd7434d1e9.jpg"}}{{/hket:inline-image}}

（東星娛樂）

其中去到《真假話題》環節嘅時候，家燕姐同姜皓文大講以前抗賊嘅經歷，家燕姐大爆自己曾經差啲被人串謀「標參」！

{{hket:inline-image name="1.JPG"}}{{/hket:inline-image}}

（《娛樂大家》電視截圖）

話說家燕姐細細個已有一定知名度，經常到處走埠登台，佢憶述有一次去到馬來西亞：「請我去個老闆好有錢，我哋Book咗成６個月嘅巡迴演出，（綁匪）同我老闆講要呢舊錢，如果唔係就郁我。」家燕姐話佢當時並唔知情，但半夜3點佢嘅酒店房突然傳來一陣急促嘅敲門聲：「『起身、起身、快啲走』我哋啲製作、樂隊同埋我拍檔小麒麟嗌我走，我當時仲瞓緊覺，我媽即刻嗌我走，我都唔知咩事，仲攬住個枕頭，我都未識驚。」

{{hket:inline-image name="hqdefault.jpg"}}{{/hket:inline-image}}

小麒麟（網上圖片）

當時佢哋連同樂隊成員，3架車一齊走，正當佢哋以為脫險嘅時候，去到怡保半路突然3架車一齊爆胎！家燕姐話佢呢個時候先至知驚：「小麒麟拎住支簫，簫一抆開係一把刀！跟住揸車嘅保鏢就話去打電話報警，因為嗰時係六幾年，冇手提電話。」不過劇情峰迴路轉，警車突然嚟到：「係警察救我，小麒麟仲係揸住支簫。」

{{hket:inline-image name="3.JPG"}}{{/hket:inline-image}}

（《娛樂大家》電視截圖）

隔咗咁多年，家燕姐講起嘅時候個樣仲猶有餘悸，佢話當時自己嚇到喊。後來家燕問小麒麟點解會帶埋刀，原來小麒麟一早見到家燕嘅保鏢喺後台睇個車胎，保鏢係同綁匪夾埋早有預謀捉家燕姐，好彩佢哋老闆洞悉先機先至有警察及時趕到。家燕姐總結時就話，出外嘅時候大家要團結呀！

撰文: 黃蘊姿