【有片】老婆婆撐拐杖被拒載不能回家 《愛回家》池美麗一個行為獲讚真女神

危難時總可看到人性的光輝。在《愛回家之開心速遞》中飾演「池美麗」的鍾凱琪，日前見一名行動不便的婆婆等車回家遇上封路，正感徬徨之際，鍾凱琪伸出援手，與另一名女士帶婆婆找交通工具回家，途中還不斷關心對方：「小心呀呢度有粒嘢」、「你O唔OK呀？」。雖然期間遇上的士拒載，不過最後都成功找到有心人義載。當時電視台新聞剛好直播助人過程，鍾凱琪其後打了千字文抒發感受，字裡行間滲透出善良、謙虛一面，獲網民一致讚賞是真女神:「愛心大使，美麗呢個名冇改錯！」、「好心哋嘅人最靚」、「好心有好報，《愛回家》可以拍番集美麗有善心」。

▼（有片睇）

{{hket:inline-image name="13.jpg"}}{{/hket:inline-image}}

(香港電台截圖)

{{hket:inline-image name="14.jpg"}}{{/hket:inline-image}}

(香港電台截圖)

鍾凱琪全文：

估唔到居然上埋新聞直播，都係同大家分享吓件事。

在下時日絕對係黑仔王，話說今日上完日文堂返屋企，點知我行到邊，邊度就啱啱有路障，Well，行多幾步當減肥。不過正當我諗住兜大圈行返屋企之際，我就見到一個老婆婆攞住拐杖同個喼，企定定喺個已經完全唔會有車到嘅車站等車。

於是（我）就上前同佢傾傾，睇下有咩可以幫到手。婆婆基本上行動不太方便，又拖喼，所以行返去佢所住的地方係好困難。但係兩邊行車線已經封咗，所以佢要去到路口才有機會離開該區域。助人為快樂之本，所以我就開口同婆婆講，希望帶佢離開。

其實香港人真係好有愛，大家互不相識，但係見到有困難嘅婆婆都樂意伸出援手。除了我之外還有一位中年姨姨，佢一路幫手安慰婆婆，我就負責跑去搵車再帶婆婆去。但可惜，搵了幾架車都被人拒絕。本來想截的士送佢，不過誠如大家喺片中所見，本來途中有位人士幫我們跑去跟的士司機聯絡，的士（司機）本來答應，但最後也轉頭離去。好在皇天不負有心人，結果都有一對男女幫忙開車載婆婆到屋企樓下。其實再困難嘅情況也好，香港人只要有能力，也好樂意幫助身邊每一個人。

一件小事，本來都冇打算同大家分享。不過當我回到家的時候，好多人都同我講在新聞直播中見到我，仲有截圖。 冇帶口罩嘅我想唔認都唔得，笑~ 完全無諗過今日會上鏡，個樣勁街坊。唉，未到萬聖節，嚇親人就唔好。可能最近有很多事都會令到大家心情比較沉重，希望這件小事能夠給你們一點正能量。I Love Hong Kong~

感謝相中2位肯幫忙載婆婆嘅人士。

{{hket:inline-image name="15.jpg"}}{{/hket:inline-image}}

(鍾凱琪instagram)

其實鍾凱琪一向都好有愛心，自小領養流浪貓，見到有繁殖場棄貓，自發開4堂慈善日文班，將收費全數捐給保護動物慈善協會（LAP）。另外，鍾凱琪見到脊髓肌肉萎縮症的患者有經濟困難，又因身患疾病難以出外學外語，於是免費上門教對方日文，她說：「雖然在下一無是處，但遇到有困難嘅人都好樂意喺能力之內幫忙。」

{{hket:inline-image name="11.jpg"}}{{/hket:inline-image}}

(鍾凱琪instagram)

撰文：張芷晴