基叔叔1998年開始加入娛樂版擔任攝影記者，當年娛樂行業發展蓬勃，跳槽幾次後薪金倍增，生活多姿多采，以為可以做到終老，基叔叔說：「我由港聞轉去娛樂，係完全另一個全新環境。我對新聞係有份情意結，覺得有份正義感同埋可以揭露社會黑暗面。後來轉做娛樂版，好好玩，多姿多采，有時電視城遇到藝人，大家會認得你，讚你啲相影得好，我開心到好似孔雀開屏咁。」
小小一句讚美說話，對攝影師而言是莫大的認同，慢慢在行內建立與藝人互信的關係，他說：「我影好多靚仔靚女，不過論到『最好影』，黃德斌真係冇得頂，佢完全冇準備，但要佢落水濕晒身都冇問題。女藝人方面，最開心係影陳自瑤，影佢影到我有初戀感覺。」
當然，基叔叔亦遇到不快的事。曾經一位男藝人一到場就揚言趕時間，要求攝影師盡快完成拍攝工作，但基叔叔拍完第一輯準備轉場景時，該藝人只顧同助手及記者閒聊，令他覺得對方的無禮令他感到不被尊重。
相關新聞：黃德斌專一愛足14年 曾患抑鬱 低潮感恩老婆不離棄
(《晴報》圖片)
基叔叔擺甫士，似乎比萬綺雯還要厲害。(圖片：受訪者提供)
當年基叔叔竟然同唐文龍鬥大隻？(圖片：受訪者提供)
做娛樂攝影絕不容易，日曬雨淋馬路邊都照坐。(圖片：受訪者提供)
為影好一張靚相，攝影師無所不用其極。(圖片：受訪者提供)
基叔叔笑言跟藝人做朋友，平日工作都愉快得多。(圖片：受訪者提供)
攝影技術漸趨數碼化，基叔叔由菲林相機轉為數碼相機年代，先要學習電腦和執相軟件。直至如今的新聞環境，影像比硬照更加重要，很多傳媒對照片已經不再重質，基叔叔說：「依家冇技能可言，求奇影完有個人就再加後期，所以學過嘅都係徒然。後來公司銷量問題，終於捱唔住要關門大吉，當時我好徬徨，因為認可嘅技能真係冇乜，得個車牌同埋識影相，好擔心自己冇咩可以做到。」
失業對很多人而言是人生的谷底，特別是基叔叔前路未明，但他沒有方寸大亂，沒有怨天尤人，反而靜靜地思考自己的方向，他說：「唔緊要，早死早超生，又可以有個新開始。我好鍾意攝影，亦好鍾意動物，特別係狗，一諗到同狗有關嘅行業，所以決定去學寵物美容。」他直言由學習上堂到考牌過程，並不是一帆風順，他說：「上堂嘅時候都有心理障礙，因為全班都係廿幾歲小妹妹，我就變成一堆妹妹中嘅一位叔叔，當時個心當然會唔舒服。我屋企3隻狗仔細個時候都係我自己幫佢哋剪毛，雖然剪到鬼五馬六咁，但叫做有經驗，變相學習時會比較易上手。」
人到中年，由零學起，除了在課堂上練習剪狗毛，晚上還要學習理論課，每日返10幾個鐘學，比以前返工還要吃力和辛苦，他說：「重點係自己未係好熟手，對小生命特別小心，所以好專注去做，個人就會好攰。」
基叔叔其中一隻愛犬火腿出浴。(《晴報》圖片)
濕晒身個樣好搞笑。(《晴報》圖片)
基叔叔對每隻狗仔都花心機剪靚靚。(《晴報》圖片)
火腿：「我咁靚仔，再修靚仔啲，唔該！」(《晴報》圖片)
基叔叔笑稱不是每隻狗都乖乖聽話，有時候被咬傷或者抓傷都在所難免。(《晴報》圖片)
由攝影師轉型成為寵物美容師，由面對人轉為面對貓貓狗狗，基叔叔認為學習良多，他說：「有時候同小動物相處，學到待人處事小技巧。人唔可以永遠高高在上，要聽吓小動物需要咩，感受一吓，佢哋唔係食兩餐就算，佢哋都要玩，要有自己生活同自由。做寵物美容，偶然被動物咬傷、被抓傷是在所難免，佢咬你其實係教緊你下次點樣避免再受傷，呢一行其實係要以謙卑嘅心去學習，動物係教緊你做人。」基叔叔人緣極佳，不少藝入得悉他轉行後，都有帶自己的寶貝寵物來美容，當中包括陸詩韻、DJ當奴、莊端兒、江若琳等。
貓貓都愛沖涼。(圖片：狗奴才寵物美容Facebook）
陸詩韻同佢寶貝狗仔都是基叔叔的客人。(圖片：狗奴才寵物美容Facebook）
DJ當奴隻貓貓剪完好英偉。(圖片：狗奴才寵物美容Facebook）
莊端兒貓貓會唔會想剪走自己個雙下巴？(圖片：狗奴才寵物美容Facebook）
江若琳同老公蕭潤邦隻「糯米糍」好冧豬。(圖片：狗奴才寵物美容Facebook）
經常有人話上帝關了一道門，總會為你開另一扇窗，馬死落地行，何況落地走走，更加能體會到貼地的可貴。能夠在第二最愛的興趣上發展，成為基叔叔的人生轉捩點，路是人行出來，怎麼會有盡頭？他說：「依家香港環境千變萬化，今日就算有高薪厚職，聽日可能面對巨大轉變，要居安思危，安定嘅時候多花時間學新嘢，學插花、學繡花都好，有興趣就去學。我部分同事都轉行，有做的士司機嘅仲開咗粉絲專頁講的士奇遇，不知幾受歡迎。」
基叔叔個性開朗樂觀，面對逆境自然能夠迎難而上。(《晴報》圖片)
愛狗之人，能夠為貓狗服務，絕對是基叔叔的第二人生。(《晴報》圖片)
場地：狗奴才寵物美容
撰文：楊安莉