見到主題公園賣廣告，令人想起多年來扮龍婆的羅蘭。羅蘭親切和藹、無架子，深受網民尊敬：「後生時靠樣貌，愈老愈有氣質，好優雅」、「好靚呀，做英女皇好似」，不過羅蘭卻自言：「英女皇咁靚，我唔夠靚呀！」，鬼咁謙虛。其實年屆85歲的羅蘭明明咁靚，為何依然單身兼獨居？
(電視截圖)
混血兒由細靚到大 演奸角被鬧兼嚇怕男人
羅蘭（原名：盧燕英）嫲嫲是印度人，是擁有4分1印度血統的混血兒，年僅4歲已參演首部電影《好女十八嫁續集》入行。本來打算「以演供學」，但演員事業很順暢，中學畢業後羅蘭決定全職做演員。直至26歲，羅蘭得到黃卓漢賞識，認為她瞪大眼兇巴巴，很適合演反派演員。由於個個影星都會改藝名，流行用2個字，加上上海交際花很喜歡用同花有關的名，取蘭花的「蘭」字，所以就改藝名「羅蘭」，配合形象。
由於不時演奸角，壞女人形象深入民心，羅蘭當時行出街都不停被人指罵：「呢個死奸鬼，睇下今次又害邊個！」另外也令男人誤以為她性格差，羅蘭說：「我後生嗰陣有個朋友想將我介紹畀個男仔，點知佢話自己的錢不夠我入電油！」後來經歷過10多段感情，連談婚論嫁的地步都未試過，羅蘭沒所謂，反而享受單身，只要多朋友就不會寂寞：「唓，你點知個男人會照顧你？可能激到你紮紮跳，仲衰過自己一個。男人20幾歲鍾意20幾歲女仔，到咗80歲都係鍾意20幾歲嘅女仔……能否過快樂嘅獨身生活好視乎性格。」
(電影截圖)
(電影截圖)
享受簡樸生活 寧願服務社會
粵語長片年代，羅蘭演出逾100多部電影，長期與陳寶珠、蕭芳芳等花旦合作。至1967年TVB啟播，羅蘭加入《歡樂今宵》演出，曾轉投麗的映聲、亞視，重返後拍過經典劇集《狂潮》、《家變》、《網中人》等，經常飾演母親。同時羅蘭繼續在影壇發展，多演神經質婦人角色。1993年在《七月十四》首次飾演能預知和聯絡鬼魂的龍婆，使羅蘭獲得2屆《香港電影金像獎》「最佳女配角」提名。1999年，羅蘭以65歲高齡接演電影《爆裂刑警》，終奪得《香港電影金像獎》影后殊榮，成為史上最年長的影后人馬。
雖然羅蘭入行81年，將畢生奉獻演藝界，卻很窮。她接受傳媒訪問時坦言工資不高，財運又很差；「幾乎買乜都輸！70年代股災我輸咗好多好多錢，我唔識股票，都係聽人講。到香港回歸前後，我放棄移民可以買樓，偏偏我冇買。」直到雷曼爆煲，羅蘭的歐洲基金、股票都受拖累跌價。現時她覺得錢夠用就行，旅行去到就足夠，寧願參與公益事務、出席慈善團體及教會活動，幫助有需要家庭及老人家。
(電影截圖)