56歲楊英偉係前無綫電視藝員，經常都演一啲無賴賤男同壞前夫等角色。喺《真情》飾演的林木川（木村）而為人所熟悉。不過賤到深入民心嘅佢其實戲外係一個專一老公兼慈父。
奸到出汁。（楊英偉Facebook）
楊英偉同太太Annie拍拖六年，結婚廿七年，除咗拍戲需要外，從來冇拖過其他女仔手。楊英偉坦言機會經常有，但佢把持得非常好，對感情上的專注及自律，從沒做對不起太太的行為，同Annie嘅感情仲愈來愈深。
當正老婆係女神
每次有這種機會埋身時，一諗起8個字就會好理智。「妻離子散， 家破人亡！」楊英偉嘅爺爺就係一個反面教材。楊英偉強調，做男人要自律，經常警惕自己，唔好為一己私慾，搞到身敗名裂，好多事做錯咗就返唔到轉頭。楊英偉勁讚太太清秀兼仙氣逼人深深吸引佢：「我老婆跳芭蕾舞，入演藝第一年，學校要集合音樂、科技、舞蹈及戲劇系合作一個大型歌劇，舞蹈組的學生被指派教戲劇系的學生，我太太Annie正好被安排教我。」楊英偉開始對太太展開追求，拍拖六年，一九九二年結婚。
楊英偉嘅青蔥歲月。（楊英偉Facebook）
囝囝曾疑有自閉症
2005年兩口子生咗囝囝楊子諾。楊英偉原本喺錦綉有一層樓，自己租住沙田政府宿舍，為咗囝囝嘅名校網決定買跑馬地冬青道，等兒子兩三歲搬去。老師話囝囝三歲未戒尿片、又唔識畫圓圈，認為佢係自閉症。去第二間幼稚園，都認為子諾有問題，後來他們找了中大研究自閉症的博士做了三小時的測試，都確定唔到佢係咪自閉症，只係話佢怕嘈、手腳協調不夠好。幸好後來囝囝再轉去另一間幼稚園讀得好開心，父母亦放下心頭大石。
楊英偉（左）同太太（右）感情深厚。（楊英偉Facebook）
領養唔再生
今年囝囝十三歲楊英偉話佢哋一直想領養多一個小朋友：「兩個人一齊長大，可以學識點樣同人相處。如果領養一個孤兒，仲可以畀對方一個溫暖嘅家。將來父母走了，子諾要一個人承擔所有事情，如果有個弟弟、妹妹，可以互相支持。」領養與否，今年就要做最後決定。
為子女無條件付出。（楊英偉Facebook）
唔做怪獸家長
楊英偉同太太身體力行教仔，四年前已開始冇請家傭，寧願全家一起做家務，話囝囝一定幫手執垃圾、吸塵、學洗廁所，亦會教佢洗衫同晾衣服。
老公生存手冊
兩公婆合組公司，少不免因意見分歧嘈交，但楊英偉同太太冇呢個問題：「或者我愈來愈愛太太，有咩拗撬，都係我識收，佢亦唔喜歡同我嘈，因為冇我咁多嘢講，意見唔同佢最多不出聲，呢招叫做無招勝有招，一個人講晒都冇癮啦。」有時佢嬲，脾氣無處發放，出去跑步跑個多鐘，返屋企就氣消。
（楊英偉Facebook）