曾經在《白色強人》中演神經病人的方紹聰（奶仔）近日趁工作空檔，特別去旅行休息，7月29日是他的32歲生日，他決定送自己一份禮物，就是獨自一人去旅行，他選擇去台灣以單車環島遊，最後去考潛水牌照，奶仔成個行程中又曬又落大雨，而且驚險重重，絕對似足拍攝《人在野》的感覺。
奶仔接受《晴報》專訪，他表示剛剛由台灣完成行程返港，過程中好多驚喜和遇見，他說：「做咗31年人，第一次自己一個去旅行，仲要去台灣踩單車環島遊，仲要學潛水，事前已經準備得好充足，不過一定好有多預計唔到嘅事發生，自己遇到突發情況，學識去諗辦法解決問題，希望可以成長，雖然講到好似懶有型咁，但今次行程真係主力係想磨練自己。」
奶仔今次獨個兒環繞台灣一圈，認真勇氣可嘉。（圖片：方紹聰Facebook)
奶仔今次行程大約花上半個月時間，先由桃園出發，踩單車環繞住台灣整個小島行一圈，期間他不時上載影片跟大家分享近況，見他曬到滿身大汗、皮膚黝黑，想必一定非常辛苦，而中途又遇上台灣打風，但他沒有放棄繼續前進，在滂沱大雨中照樣踩公路，認真險象環生。直到生日當日，奶仔說：「呢個生日自己一個人喺外地度過，事前同朋友同家人講呢件事，大部分人都反對，但又有人覺得贊成。作為一個香港人，以我哋知識同睇世界嘅視野，去辨別一件事情對或錯，點都唔會太失敗。今次旅行入面我成功考到潛水牌，又完成環島，過程成長咗好多，所以如果有件事你係覺得啱嘅，就做啦！啱就啱，大家要堅持，加油！」雖然人在野，但奶仔生日都不忘為香港加油！
過程中，有時候每日要應付8小時的行程，非常吃力。（圖片：方紹聰Facebook)
一時大大個太陽曬到爆。（圖片：方紹聰Facebook)
一時滂沱大雨淋到全身濕晒。（圖片：方紹聰Facebook)
奶仔生日都自己一個人度過，不過今次絕對值得。（圖片：方紹聰Facebook)
奶仔今次環島遊看似輕鬆，但其實他事前做足功課。大家出發前，記得注意呀！
1. 了解地理環境
奶仔事前做足資料搜集，由於台灣是一個長型的島，向南行或者北行都可以有不同的路徑可以走，所以路線一定要清楚，萬一迷路就大件事。而奶仔就話幸好朋友之前搵佢做送貨，順便賺錢幫補生計，令佢學識上網睇地圖，方向感都好，所以無論駕駛客貨車定單車都安全，特別得心應手。
2. 練習在馬路上踩單車
奶仔話以前好驚踩單車踩馬路，所以自己慢慢由慈雲山開始出發，去附近周邊的地方，之後再認識一班志同道合的單車友，慢慢踩勻成個香港，而且佢考埋電單車牌，所以儲夠足夠信心同經驗先出發去台灣。
3. 準備合適的裝束
奶仔除了全副單車武裝，包括單車衫、頭盔、太陽眼鏡等之外，還準備了涼鞋和易乾的便服，事關台灣天氣比較多雨，遇著下雨天，奶仔都照樣著涼鞋出街周圍去，連雨傘和雨衣都不用，直接淋完雨就回旅社沖涼，好狂野。
奶仔自我挑戰成功，恭喜恭喜！（圖片：方紹聰Facebook)